استانادا ەلىمىزدىڭ كيەلى جەرلەرىنە ارنالعان كورمە اشىلدى
كورمەدە پولشا، شۆەيتساريا جانە قازاقستان سۋرەتشىلەرىنىڭ ەلىمىزدىڭ كيەلى جەرلەرىنە جاساعان ەكسپەديتسياسىنىڭ ناتيجەسى بويىنشا دالالىق زەرتتەۋلەرى ۇسىنىلدى.
مۇندا 6 سۋرەتشى - گرەگور ۆوگەل (شۆەيتساريا) ، مارەك ماردوسوۆيچ (پولشا) ، گرەگورچ دەمزۋك (پولشا) ، نازيرا كاريموۆا (قازاقستان) ، ارمان ساين (قازاقستان) ، ءانۋار مۇسىرەپوۆتىڭ (قازاقستان) . جۇمىستارى قويىلعان
«بۇگىنگى جوبا ەۋروپا مادەنيەتىنىڭ مۇراسى جىلى جانە ەۋرووداق پەن قازاقستاننىڭ 25 جىلدىق ديپلوماتيالىق قارىم- قاتىناسى اياسىندا ۇيىمداستىرىلدى. كورمەگە ءۇش مەملەكەت سۋرەتشىلەرىنىڭ قازاقستاننىڭ كيەلى جەرلەرىنە ارنايى جاسالعان ەكسپەديتسيانىڭ ناتيجەسىندەگى جۇمىستارى قويىلدى. كورمەدە پۇتقا تابىنۋ مادەنيەتىنىڭ كونە ەسكەرتكىشتەرى، ەرەكشە كۇش ورىندارى، پالەوليت ءداۋىرىنىڭ نەكروپولدەرى، ورتاعاسىرلىق يسلام مازارلارى جانە بىرەگەي تابيعات قۇبىلىستارى ونەر جانە تەحنولوگيا ارقىلى جاندانادى. ايتۋلى شارانى ۇيىمداستىرۋعا اتسالىسقان بارلىق ازاماتتارعا جانە ارنايى شىعارماشىلىق ەڭبەكتەرى ءۇشىن سۋرەتشىلەرگە العىسىمدى بىلدىرەمىن» ، - دەدى ەۋرووداقتىڭ قازاقستانداعى وكىلدىگىنىڭ باسشىسى سۆەن- ولوۆ كارلسسون.
كوركەمدىك زەرتتەۋ وبەكتىسى بولىپ تاڭدالعان وڭىرلەردىڭ ءبىرى - ماڭعىستاۋ. ەجەلگى كوشپەندىلەر تۇراعىندا پالەوليت ءداۋىرىنىڭ سانسىز ەسكەرتكىشتەرى، ەجەلگى قابىرلەر، كيەلى جەرلەر مەن 362 دەن استام اۋليەنىڭ قورىمدارى ساقتالعان. عالىمداردىڭ پايىمداۋىنشا، ماڭعىستاۋ ەجەلگى مۇحيتتىڭ ءتۇبى بولعان جەردە ورنالاسقان. سونىمەن قاتار، بۇل وڭىردە قازاقستاندىق مۇنايدىڭ تورتتەن ءبىر بولىگى وندىرىلەدى.
«ينستاللياتسيالاردى جاساۋ ءۇشىن سۋرەتشىلەر التىنەمەل ۇلتتىق ساياباعى مەن ماڭعىستاۋدىڭ كيەلى جەرلەرىمەن تانىسىپ، زەرتتەپ شىقتى. ءار جۇمىستى جاساۋعا شامامەن 1 اپتادان استام ۋاقىت كەتتى. ەۋروپالىق سۋرەتشىلەر ەلىمىزدىڭ قاسيەتتى جەرلەرىنىڭ تۇنىپ تۇرعان تاريحىن بۇزباي زاماناۋي قالىپقا كەلتىرىپ، كورەرمەندەرگە ۇسىنا ءبىلدى دەپ ويلايمىن. بۇل دەگەنىمىز، ءتىرى تاريحتى، ماڭگىلىك ونەرگە اينالدىرۋمەن بىردەي» ، - دەدى سۋرەتشى ءارى كورمەنىڭ كۋراتورى ءانۋار مۇسىرەپوۆ.
كەلەسى باعىتىندا سۋرەتشىلەر الماتى قالاسىنىڭ ماڭىندا ورنالاسقان «التىن ەمەل» ۇلتتىق قورىعىنا ساياحات جاسادى. باستى نازار ءانشى قۇم توبەسىنە اۋدارىلدى. بۇل تابيعات فەنومەنى قۇرعاق اۋا رايىندا قۇمنىڭ قوزعالىسى اسەرىنەن ءان ىرعاعىنا ۇقساس ءۇننىڭ ەستىلۋىمەن بەلگىلى.
ەجەلگى زاماننان بەرى ءانشى قۇمنىڭ ءۇنى كوپتەگەن اڭىزداردىڭ تۋىنداۋىنا سەبەپ بولدى. كەيبىر حالىق اڭىزدارىنا سۇيەنسەك، بۇل قۇم استىندا جاتقان قالا قوڭىراۋلارىنىڭ ءۇنى، باسقا اقپاراتقا سايكەس، حالىق فولكلورى وسى جەردە شىڭعىس حاننىڭ زيراتى ورنالاسقان، ال ءۇن ونىڭ جان ازاپتارىن بەينەلەيدى دەپ سەنەدى.
اتالمىش كورمە ماڭعىستاۋ وبلىسى اكىمدىگى جانە قازاقستانداعى شۆەيتساريا ەلشىلىگىمەن بىرلەسىپ قازاقستانداعى ەۋروپالىق وداق وكىلدىگىمەن «Astana Art Show» زاماناۋي ونەر فەستيۆالى اياسىندا ۇيىمداستىرىلدى.
ايتا كەتەيىك، بۇدان بۇرىن استانا ءبىر اي بويى قازىرگى زامانعى ونەر ورتالىعىنا اينالاتىندىعىن، ەلوردادا شەتەلدە تۇراتىن قازاقستاندىق سۋرەتشىلەردىڭ كورمەسى وتەتىنىن حابارلاعان بولاتىنبىز.