بۋرابايداعى ابىلاي حان الاڭىنان ساپارعا شىققان «ابىلاي حاننىڭ قارا جولى» ەكسپەديتسياسى مارەسىنە جەتتى
بەلگىلى ولكەتانۋشى جانە قوعام قايراتكەرى مۇرات قاجى ىدىرىس ۇلى باستاعان ەكسپەديتسيا مۇشەلەرىن كوكشەتاۋلىقتار قالاعا كىرەبەرىس قاقپانىڭ الدىندا شاشۋ شاشىپ، ءسان- سالتاناتپەن قارسى الدى.
«ابىلاي حاننىڭ قارا جولىمەن 4300 شاقىرىم جول جۇردىك. قازاقتىڭ تالاي ءبىر قاسيەتتى دە، كيەلى جەرلەرىن باسىپ ءوتىپ، تۇركىستانعا باردىق. جول بويى ەكسپەديتسيا مۇشەلەرىن جەرگىلىكتى جەردىڭ حالقى مەن ەل اعالارى، باسشىلار قۋانا قارسى الىپ وتىردى» ، - دەدى ەكسپەديتسيا جەتەكشىسى مۇرات قاجى ىدىرىس ۇلى.
قىركۇيەكتىڭ 17- كۇنى ابىلاي حان ءۇش ءجۇزدىڭ باسىن قوسقان بۋرابايدان باستاۋ العان ەكسپەديتسيا قورعالجىن، نۇرانى بويلاپ، ۇلىتاۋ، قىزىلوردا ارقىلى كونە سىعاناق جانە ساۋران قالالارىنىڭ اشىق اسپان استىنداعى مۇراجايلارىندا، قاسيەتتى تۇركىستاندا بولىپ، قايتىپ ورالدى. ەكسپەديتسيا قورىتىندىسى بويىنشا ابىلاي مەن ونىڭ زامانى تۋرالى جينالعان ماتەريالداردان عىلىمي ماقالالار مەن جيناقتار شىعارۋ جوسپاردا بار. «ابىلاي حاننىڭ قارا جولى» اتتى كوركەم فيلم دە تۇسىرىلمەك. وعان قوسا، اقمولا وبلىسى جانە كوكشەتاۋ قالاسىنىڭ تابيعي جانە توپونيمدىك لانشافتىن قولدانا وتىرىپ جينالعان، ەلىمىزدە تەڭدەسىز توپوگرافيالىق كارتا قۇراستىرىپ، شىعارۋ جوسپاردا بار.
