قويان- قولتىق ۇرىستان الەم چەمپيوندارى ەلگە ورالدى

  كوكشەتاۋ. قازاقپارات - اقمولالىقتار قويان- قولتىق ۇرىس بويىنشا وتكەن الەم بىرىنشىلىگىندە جەڭىسكە جەتكەن جەرلەستەرى زارينا قانافينا مەن جۇلدەگەرلەرى رەگينا ماكسيموۆا، گۇلنۇر مىرزاتايەۆا جانە مادي الياكپاروۆتى قۋانىشپەن قارسى الدى، دەپ حابارلايدى قازاقپارات ءتىلشىسى.

اقمولا وبلىسىنىڭ دەنە شىنىقتىرۋ جانە سپورت باسقارماسى باسپا ءسوز قىزمەتىنىڭ مالىمەتى بويىنشا، كوكشەتاۋ تەمىرجول ۆوكزالىندا چەمپيونداردى جانكۇيەرلەرى، وبلىستىق دەنە شىنىقتىرۋ جانە سپورت باسقارماسىنىڭ وكىلدەرى، جاتتىقتىرۋشىلارى، تۋىستارى مەن دوستارى قۇشاق جايا قارسى العان. زارينا قانافينا، رەگينا ماكسيموۆا، گۇلنۇر مىرزاتايەۆا جانە مادي الياكپاروۆپەن بىرگە، ولاردىڭ جاتتىقتىرۋشىلارى بەكزات بايمۇراتوۆ، اسلان زەينوللايەۆ، جاسلان جانتاسوۆ جانە دارحان قاسىموۆ كەلدى.

«مەن جەڭىسكە جەتكەن كەزدە قاتتى تولقىدىم. وزىمە ءوزىم سەنگەن جوقپىن. سول كەزدەگى سەزىمىمدى اۋىزبەن جەتكىزۋ مۇمكىن ەمەس. بۇعان ارينە، بارشاڭىزدىڭ قوسقان ۇلەستەرىڭىز زور"، دەپ ءوزىنىڭ قۋانىشىمەن ءبولىستى زارينا قانافينا.

 ەسكە سالا كەتەيىك، جاقىندا رەسەيدىڭ تۋلا قالاسىندا رەسەي، قازاقستان، بەلارۋس، گرۋزيا، ارمەنيا، رۋمىنيا، ازەربايجان، چەحيا، گەرمانيا ءتارىزدى الەمنىڭ 37 ەلىنەن جينالعان 18 جاسقا دەيىنگى 300 ۇل مەن قىز جانە 21 جاسقا دەيىنگى جاستار اراسىندا قويان- قولتىق ۇرىستان الەم بىرىنشىلىگى ءوتتى. جەڭىمپازدار 47 سالماق بويىنشا انىقتالدى. قازاقستان قۇراماسى ساپىندا اقمولا وبلىستىق بالالار مەن جاسوسپىرىمدەردىڭ مامانداندىرىلعان سپورت مەكتەبىنىڭ تۇلەكتەرى بولدى. ونىڭ ىشىندە 65 كەلى سالماقتا سىنعا تۇسكەن زارينا قانافينا جارىس يەلەرى رەسەي جانە يران ەلىنىڭ سپورتشىلارىن تىزە بۇكتىرىپ، الەم چەمپيونى اتانسا، رەگينا ماكسيموۆا (60 ك گ) گۇلنۇر مىرزاتايەۆا (50 ك گ) جانە مادي ءالياكپاروۆ (36 ك گ) قولا جۇلدەگەر اتاندى. بۇدان بولەك رەگينا ماكسيموۆاعا جەڭىسكە دەگەن جىگەرى ءۇشىن ارنايى كۋبوك تاپسىرىلدى.