استاناعا كولىكپەن كىرۋ ءۇشىن قاي ساعاتتار اقىلى بولادى

 استانا. قازاقپارات - استانا اكىمدىگى قاۋىرت ۋاقىتتا قالاعا كىرۋگە اقى الۋ جۇيەسىن ەنگىزۋ ماسەلەسىنە قاتىستى تۇسىنىكتەمە بەردى، دەپ حابارلايدى قازاقپارات ءتىلشىسى.

«بۇگىندە ەلوردادا اۆتوموبيل سانى ارتىپ كەلە جاتىر. استانادا شامامەن 500 مىڭ كولىك قۇرالى بار. ولاردىڭ 324 مىڭى تىركەلسە، 80 مىڭنان استامىن سىرتتان كەلەتىن كولىكتەر قۇرايدى. ال قالعان كولىكتەر - بۇلار وزگە وڭىرلەردە تىركەۋگە الىنعان، ءبىراق، يەلەرى ەلوردادا تۇرادى. سوندىقتان بىزدەگى دەڭگەي وتە جوعارى، كولىك قۇرالدارىن جان باسىنا ەسەپتەيتىن بولساق لوندونعا جاقىنداپ قالدى. سول سەبەپتى قوعامدىق كولىك سالاسىن جاقسارتۋ جانە كوشە جەلىلەرىنىڭ جۇكتەمەسىن تومەندەتۋ ءۇشىن ءبىرقاتار شارا قابىلدانۋدا. ونىڭ ءبىرى قالانىڭ 6 نۇكتەسىنە كىرۋدى اقىلى جاساۋ جوسپارلانعان» ، - دەدى «استانا LRT» ج ش س باسقارماسى ءتوراعاسىنىڭ ورىنباسارى بەيبىت ەسجانوۆ ەلوردا اكىمدىگىندە وتكەن باسپا ءسوز ءماسليحاتىندا.

 ونىڭ تۇسىندىرۋىنشە، اقىلى كىرۋ قاۋىرت ۋاقىتقا ەسەپتەلگەن. ماسەلەن، تاڭەرتەڭگى ساعات 7 دەن 9 عا دەيىن جانە كەشكىسىن 17 دەن 20 عا دەيىن ارالىقتى قامتيدى.

 «اقىلى كىرۋدى ەنگىزۋدىڭ ءمانى مىنادا، بۇگىندە كۇن سايىن 82 مىڭنان استام كولىك قالاعا كىرەدى جانە كوشە- جول جەلىسىنە جۇكتەمە شامامەن 17 پايىزدى قۇرايدى. ەگەر قاۋىرت ۋاقىتتا اقىلى كىرۋدى ەنگىزەتىن بولساق، حالىقتىڭ كوپشىلىگى قوعامدىق كولىككە مىنەدى دەپ ويلايمىز. قازىرگى ۋاقىتتا بىزدە 16 قالا ماڭىزى باعدارى بار، قوزعالىس ارا قاشىقتىعى 4 مينۋتتى قۇرايدى. سوندىقتان قالا ماڭىندا تۇراتىن تۇرعىنداردىڭ جايلى ساپارىن قامتاماسىز ەتۋ ءۇشىن قاجەتتى بارلىق شارالاردى جۇزەگە اسىرامىز» ، - دەدى ول.

 وسى رەتتە ب. ەسجانوۆ قالا كىرۋ ءۇشىن كولىك يەلەرىنەن الىناتىن اقىنىڭ شامامەن قانشا بولاتىندىعىن ايتا المادى. دەگەنمەن، ول اقىلى كىرۋدى ەنگىزۋ قالا كوشەلەرىندەگى جۇكتەمەنى 15-20 پايىزعا تومەندەتەتىندىگىنە سەنىمدى ەكەندىگىن جەتكىزدى.