مەملەكەتتىك قىزمەتشىنىڭ جالاقىسى جاڭاشا تولەنەدى

 استانا. قازاقپارات - ەلىمىزدە مەملەكەتتىك ورگاندارداعى مەملەكەتتىك قىزمەتشىلەرگە ەڭبەكاقى تولەۋدىڭ جاڭا جۇيەسىن ەنگىزىلمەك.

ورالدا جۋرناليستەرمەن جۇزدەسكەن قازاقستان رەسپۋبليكاسى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىنىڭ ب ق و بويىنشا دەپارتامەنتى باسشىسى، ادەپ جونىندەگى كەڭەس ءتوراعاسى بولات يساقوۆ رەفورمانىڭ ءجاي- جاپسارى تۋرالى كەڭىرەك ايتىپ بەردى.

لاۋازىمدى جۇمىستى اتقارۋ ءۇشىن قاجەتتى ءبىلىمى، جاۋاپكەرشىلىك دارەجەسى مەن تۇپكى ناتيجەگە بايلانىستى ەڭبەكتى باعالاۋ جۇيەسى اقش، سينگاپۋر، جاڭا زەلانديا ەلدەرىندە قولدانىلادى ەكەن. ءبىزدىڭ ەلىمىزدە 174 جەكە جانە كۆازيمەملەكەتتىك كومپانيا دا ءوز قىزمەتكەرلەرىنە ءدال وسى ءادىس بويىنشا جالاقى تولەپ وتىرعان كورىنەدى. ازىرگە پيلوتتىق جۇيە ەنگىزىلگەن مەملەكەتتىك ورگاندارداعى مەملەكەتتىك قىزمەتشىلەردىڭ ەڭبەكاقىسى 2 ەسەگە وسكەن. بوس ورىنعا بايقاۋعا قاتىسۋشى سانى دا 3 ەسەگە كوبەيگەن، كادر كەتۋى 3 ەسە ازايعان. بۇرىن ايماقتار پەن ورتالىق مەملەكەتتىك ورگاندارداعى مەملەكەتتىك قىزمەتشىلەردىڭ ەڭبەكاقىسىنداعى ايىرماشىلىق% 70 عا دەيىن جەتسە، قازىر %10 عا دەيىن قىسقاردى. ەلباسى بيىلعى جولداۋىندا مەملەكەتتىك قىزمەتشىلەرگە ەڭبەكاقى تولەۋدىڭ پيلوتتىق جاڭا جۇيەسىن جۇزەگە اسىرۋدى تاپسىرعان بولاتىن. رەفورماعا پيلوتتى ورگان رەتىندە مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگى، ادىلەت مينيسترلىگى، ماڭعىستاۋ جانە استانا قالالارىنىڭ اكىمدىكتەرى تاڭدالدى.

 بۇل جوبانى دايىنداۋدى اگەنتتىك «100 ناقتى قادام» ۇلت جوسپارىن جۇزەگە اسىرۋ شەڭبەرىندە 2015 -جىلدان باستاعان ەكەن. بۇگىندە مەملەكەتتىك قىزمەتكەر ەكى پارامەترى - ەڭبەك ءوتىلى جانە لاۋازىمىنا سايكەس قانا جالاقى الادى. ءبىراق اتقارىپ وتىرعان جۇمىسىنىڭ كۇردەلىلىگى مەن قىزمەتكەردىڭ تيىمدىلىگى ەسەپكە الىنباي، سىيلىق اقى، ۇستەماقىلار بىردەي ولشەمدە بەرىلەدى. وسىلايشا ورتالىق پەن ايماقتاعى مەملەكەتتىك قىزمەتشىلەردىڭ، سونداي- اق، مەملەكەتتىك پەن جەكە سەكتوردىڭ قىزمەتشىلەرىنىڭ ەڭبەكاقىسىندا تەپە- تەڭسىزدىك پايدا بولعان. - ەڭبەكاقى تولەۋدىڭ جاڭا جۇيەسى وسى كەمشىلىكتى جويادى. ەندى جالاقى فاكتورلى- باللدىق شكالا نەگىزىندە تىركەلگەن بولىگىنەن جانە بونۋستار - اۋىسپالى بولىگىنەن قۇرالادى، - دەيدى بولات يساقوۆ. مەملەكەت باسشىسى قازاقستان حالقىنا جولداۋىندا ۆەدومستۆالىق باعىنىستى ۇيىمداردى جەكەشەلەندىرۋ مەن شوعىرلاندىرۋدى جەدەلدەتۋدى جانە بوساتىلعان قاراجاتتى ەڭبەكاقى تولەۋدىڭ جاڭا جۇيەسىنە بيىل ەنگىزۋدى تاپسىرعان بولاتىن. - مەملەكەتتىك ورگاندار باسشىلارى ءقازىردىڭ وزىندە ۇنەمدەلگەن قاراجاتتى قىزمەتكەرلەردىڭ جالاقىسىن كوتەرۋ ءۇشىن پايدالانا الادى» - دەيدى ب. يساقوۆ.

قازبەك قۇتتىمۇرات ۇلى، «ەگەمەن قازاقستان» باتىس قازاقستان