استانادا اۆتوبۋس جۇمىسىن باقىلايتىن قىزمەتكەرلەر قاتارى كوبەيتىلەدى
قالالىق كولىك جانە جول ينفراقۇرىلىمىن دامىتۋ باسقارماسىنىڭ باسشىسى ءاليحان قۋاتبەكوۆ اكىمدىكتە وتكەن باسپا ءسوز ءماسليحاتىندا وسى تۋرالى ايتىپ بەردى، دەپ حابارلايدى قازاقپارات ءتىلشىسى.
«وزدەرىڭىز جاقسى بىلەسىزدەر، سارالانعان تاريف ەنگىزىلگەلى بەرى كولىك كارتالارىن پايدالانۋدا ءبىراز كۇردەلى ماسەلەلەر بار. ونى جاسىرمايمىز. قوعامدىق كولىكتە جۇرەتىن استانالىقتاردىڭ 93 پايىزى وسى كولىك كارتالارىنا اۋىستى. سوعان قاراماستان، ءالى دە كارتالاردىڭ تولتىرىلۋىنداعى ولقىلىقتاردى جويۋ ماسەلەلەرىن العا قويىپ وتىرمىز. سونىمەن بىرگە، اۆتوبۋستاردىڭ ينتەرۆالداردى ساقتاماۋ جاعى ءالى دە كوپ ورىن الىپ وتىر. وسىنىڭ سالدارىنان اسىرەسە كەشكى ۋاقىتتا ايالدامالاردا اۆتوبۋستى جولاۋشىلار كوپ كۇتىپ قالادى. مۇنى شەشۋدىڭ جولى بار. قازىر ءبىز «استانا ل ر ت» كومپانياسىنا تاپسىرما بەرىپ، باقىلاۋشىلاردى كوبەيتۋ جۇيەسىن قولعا الىپ وتىرمىز. از ۋاقىتتا ول جۇمىس ناتيجەسىن بەرەدى دەپ ەسەپتەيمىز» ، - دەيدى ول.
ءاليحان قۋاتبەكوۆ باسپا ءسوز ءماسليحاتى بارىسىندا باقىلاۋشىلار تەك تولەمنىڭ جۇرگىزىلگەنىن تەكسەرۋمەن شەكتەلمەيتىنىن اتاپ ءوتتى.
«ول باقىلاۋشىلار تەك اقشانىڭ تولەنۋ ماسەلەسىن عانا ەمەس، اۆتوبۋستاردىڭ سانيتارلىق جاعدايىن، جۇرگىزۋشىلەردىڭ ءوز جولىندا قالاي ۇستاۋىن، اۆتوينفورماتور، ياعني ايالدامالاردى ۋاقتىلى حابارلاۋ ماسەلەلەرىن تەكسەرەدى. وسى ماسەلەلەردىڭ ءبارى دە جاقىن ارادا شەشۋگە بولاتىن شارۋالار دەپ ەسەپتەيمىز» ، - دەيدى ول.