تاريحي تاقىرىپتاعى «توميريس» فيلمىن ءتۇسىرۋ جۇمىستارى اياقتالۋعا جاقىن

استانا. قازاقپارات- بۇعان دەيىن قاپشاعاي، شونجى مەن بۋرابايدا بولعان «توميريس» تاريحي فيلمىن تۇسىرۋشىلەر جاقىندا الماتىداعى «قازاق فيلمگە» ويىستى.

 قازىر كينوستۋديا اۋماعىندا سالىنعان ايگىلى ۆاۆيلون قالاسىنىڭ دەكوراتسياسىندا ءتۇسىرىلىپ جاتىر، دەپ حابارلايدى «حابار 24» ارناسى.

تاريحي فيلمدى ءتۇسىرۋ جۇمىستارى وتكەن جىلى قازان ايىندا باستالعان ەدى. بۇگىن توميريستىڭ جۇبايى ارعۇن مەن ۇلى سپارگاپتىڭ كونە شاھار ۆاۆيلونعا، قۇرىش پاتشاعا كەلەتىن ءساتى ءتۇسىرىلدى. ايتپاقشى ەجەلگى ۆاۆيلوننىڭ نوبايىن كەلتىرۋگە قۇرىلىسشىلار التى اي ۋاقىت جۇمساعان.

 اقان ساتايەۆ، «توميريس» فيلمىنىڭ قويۋشى رەجيسسەرى:

 -  ۇلكەن جانە كۇردەلى ساحنا. 150 ادام قوسىمشا تۇسەدى. ونىڭ ءبارىن كومپيۋتەر ارقىلى كوبەيتەمىز. جانە دەكوراتسيالاردى دا كومپيۋتەردەن دۇرىستاتىپ، كولەمىن ۇلكەيتەمىز. سوعىس ساحنالارىن اۋقىمدى كورسەتۋ ءۇشىن دە كومپيۋتەرلىك تەحنولوگيا قولدانىلادى.

نەگىزگى رولدەردى وينايتىن اكتەرلاردىڭ بارلىعى «نوماد» جاتتىعۋ لاگەرىندە ارنايى دايىندىقتان وتكەن. باستى رولگە 15 مىڭ قىز- كەلىنشەكتىڭ ىشىنەن تاڭداپ الىنعان الميرا تۇرسىن ەكى اي دايىندىقتان سوڭ ات جالىن تارتىپ ءمىنىپ، سەمسەرلەسۋدى ۇيرەنگەنىن ايتادى.

الميرا تۇرسىن، توميريس پاتشايىم رولىندەگى اكتريسا:

 -   قىزىعى دا، قيىندىعى دا بولدى. كەيبىر كەزدە شارشايسىڭ. كوستيۋم كيگەندە ىستىقتايسىڭ. اتپەن شاباسىڭ. مىسالى، ءبىز كونە تۇرىك تىلىندە سويلەيمىز. ءتىلىڭ كەلمەيدى.

باستى ءرول مەن ەپيزودتا وينايتىن اكتەرلەرگە ارناپ مىڭعا جۋىق، ال توميريسكە ارناپ 20 كوستيۋم تىگىلىپتى. سونداي- اق 10 مىڭ قارۋ- جاراق سوعىلعان. شىعارماشىلىق توپ 1-2 كۇندە ءتۇسىرۋ جۇمىستارىن اياقتاپ، مونتاجداۋ جانە دىبىستاۋ جۇمىستارىن باستايدى. ال كەلەسى جىلى ناۋرىز مەرەكەسىنىڭ قارساڭىندا «توميريس» فيلمى كورەرمەنگە جول تارتادى.

www.24.kz