قازاقستاندا «ماحاببات، قىزىق مول جىلدار» اتتى تەلەحيكايا تۇسىرىلەدى

استانا. قازاقپارات - الداعى جىلى جازۋشى ءازىلحان نۇرشايىقوۆ رومانىنىڭ جەلىسى بويىنشا «ماحاببات، قىزىق مول جىلدار» اتتى تەلەحيكايا تۇسىرىلمەك.

بۇل تۋرالى استانادا ءوتىپ جاتقان «Astana Media Week» كەزىندە «MG Production» كينوكومپانياسىنىڭ باس پروديۋسەرى ەرنار مالىكوۆ ءمالىم ەتتى، دەپ حابارلايدى قازاقپارات ءتىلشىسى.

«كەزىندە اباي اتامىز «قۇداي-اۋ، قايدا سول جىلدار، ماحاببات، قىزىق مول جىلدار، اقىرىن اقىرىن شەگىنىپ، الىستاپ كەتتى-اۋ قۇرعىرلار» دەپ جىرلاعانداي، وسى ءتورت جول ولەڭدى بەتكە ۇستاي وتىرىپ، مارقۇم بولعان ءازىلحان نۇرشايىقوۆ اعامىزدىڭ «ماحاببات، قىزىق مول جىلدار» رومانى بويىنشا ون سەريالىق تەلەحيكايا تۇسىرۋگە دايىندىق جاساپ جاتىرمىز. نەگە دەسەڭىزدەر، زامان قالاي وزگەرسە دە، ادامنىڭ تۇرمىس-سالتى مىڭ تۇرلەنسە دە، پەندەنىڭ ىشكى دۇنيەسى وزگەرمەيدى. بۇكىل الەمدى ۇستاپ تۇرعان - ماحاببات. ماحاببات - قىز بەن جىگىتتىڭ اراسىنداعى ىستىق سەزىم عانا ەمەس. ودان بولەك، وتانعا، ەل مەن جەرگە دەگەن ماحابباتتىڭ بار ەكەنىن بىلەمىز. شىنايى ماحاببات تۋرالى كينو قوعامعا يدەولوگيالىق سەرپىن بەرەر دەگەن ويدامىز. ءبارى بەكىتىلەتىن بولسا، «ماحاببات، قىزىق مول جىلدار» تەلەجوباسىن كەلەسى جىلى باستاماق ويىمىز بار»، - دەدى ەرنار مالىكوۆ.

ونىڭ ايتۋىنشا، ەلىمىزدە دارىندى جاستار از ەمەس. سوندىقتان، كينوكومپانيا وكىلدەرى ايگىلى اكتەرلەردى اينالىپ ءوتىپ، وبلىس-وبلىستارعا تەلەەكسپەديتسيا جاساپ، تاساداعى تالانتتاردى ىزدەمەك. «ماحاببات، قىزىق مول جىلدار» تەلەجوباسىنداعى باستى كەيىپكەر مەڭتاي مەن ەربولدى سومدايتىن اكتەرلەردى كومپانيا وكىلدەرى وسىلاي تابۋدى كوزدەپ وتىر.

ەسكە سالا كەتسەك، ەلورداداعى «قازمەديا» ورتالىعىندا «Astana Media Week» قازاقستاندىق مەديا-اپتالىعى ءوتىپ جاتىر. ءۇش كۇنگە سوزىلاتىن ايتۋلى شارانىڭ باستى تاقىرىبى - DIGITAL MEDIA.