ءۇندىستاندىق كومپانيا تۇركىستان وبلىسىندا قۇس شارۋاشىلىعىن دامىتپاق
ءۇندىستان نارىعىنىڭ 90 پايىزعا جۋىعىن قۇس ەتىمەن قامتاماسىز ەتىپ وتىرعان الپاۋىت كومپانيا وكىلدەرى تۇركىستان وبلىسىنا ينۆەستيتسيا سالۋعا نيەتتى ەكەنىن جەتكىزدى، دەپ حابارلايدى قازاقپارات ءتىلشىسى.
كەزدەسۋدە ءوڭىر باسشىسى وبلىسىمىزدا اۋىل شارۋاشىلىعى سالاسىن دامىتۋعا تولىق مۇمكىنىك بار ەكەنىن جەتكىزدى. قۇس شارۋاشىلىعىن حالىقارالىق دەڭگەيگە كوتەرۋ ارقىلى ەكسپورت كولەمىن ارتتىرۋعا بولاتىنىن ايتىپ، وسى سالاعا جاۋاپتى ورىنباسارلارىنا ءۇندىستاندىق ينۆەستورمەن ىسكەرلىك بايلانىستى ناقتىلاۋدى تاپسىردى.
«تۇركىستان وبلىسى وزبەكستان رەسپۋبليكاسىمەن شەكتەسەدى. وڭىردەن باتىس ەۋروپا - باتىس قىتاي قىتاي ماگيسترالى وتەدى. جۇمىس كۇشى كوپ ءارى تابيعاتى شارۋاشىلىققا قولايلى. بىرنەشە قۇس فابريكاسى بار. ءبىز اكىمدىك تاراپىنان قۇس شارۋاشىلىعىن دامىتىپ، كلاستەر قۇرۋعا ءاردايىم قولداۋ كورسەتۋگە دايىنبىز. ەگەر ينۆەستورلار كەلەتىن بولسا، جەر جانە ينفراقۇرىلىم ماسەلەسىنە دە كومەك كورسەتىلەدى. ەكىجاقتى جوبالار ءۇندىستانعا دا، قازاقستانعا دا پايدالى بولادى دەپ ويلايمىن. بىرلەسىپ جۇمىس ىستەۋگە ءازىرمىز»، - دەدى ج. تۇيمەبايەۆ.
ال، «Venkateshwara Hatcheries Private Limited» (VH group) كومپانياسىنىڭ وپەراتسيالار جونىندەگى باس ديرەكتورى مۇرتۇزا ءالي يسمايل ماگدۋم تۇركىستانعا كەلۋدەگى ماقساتىن ءتۇسىندىردى. ينۆەستوردىڭ ايتۋىنشا، كومپانيا 1971-جىلى قۇرىلعان. تەك ءۇندىستاندا عانا ەمەس، ا ق ش جانە ەۋروپا ەلدەرىندە بىرلەسكەن كاسىپورىندارى مەن جوبالارى بار.
قازىر الەمدە Venky's دەگەن برەندىمەن تانىلعان الپاۋىت كومپانيا قۇس وسىرۋمەن، جۇمىرتقا وندىرۋمەن قاتار جۇمىرتقا ۇنتاعىن دا كادەگە اسىرىپ ءجۇر. ارنايى زەرتتەۋ ورتالىقتارىندا قۇس شارۋاشىلىعىنا قاجەتتى ۆاكتسينا شىعارۋمەن دە اينالىسادى. وسى دەرەكتەرگە توقتالعان ءۇندىستاندىق كومپانيا باسشىسى كەلىسسوزدەر ءساتتى اياقتالسا، تۇركىستان وبلىسىندا جۇمىس باستاۋعا دايىن ەكەنىن مالىمدەدى. دالىرەك ايتساق، «ورداباسى قۇس» جانە «شىمكەنت قۇس» ج ش س- مەن دە بىرىككەن جوبالاردى جۇزەگە اسىرۋدى كوزدەپ وتىر.