تەمىرتاۋ ماڭىندا كوشپەندىلەردىڭ قىستاعى پايدا بولادى

قاراعاندى. قازاقپارات - تەمىرتاۋ قالاسىنىڭ ماڭىندا قازاق كوشپەندىلەرىنىڭ قىستاعى پايدا بولادى.

مۇندا كەلۋشىلەر ءوز قولدارىمەن ەجەلگى تەحنولوگيالار بويىنشا ءجۇن تازالاپ، توقىما توقىپ، ءشيتتى جانە سامان كىرپىشتەرىن قۇيا الادى، دەپ حابارلايدى قاراعاندى وبلىسى اكىمىنىڭ رەسمي سايتى.

بۇل قىستاق 29- قىركۇيەكتە وتەتىن «جاۋىرتاۋداعى كەزدەسۋ» فورۋم-فەستيۆالىنىڭ ينتەراكتيۆتى الاڭدارىنىڭ بىرىنە اينالماق.

تەمىرتاۋدىڭ تاريحي-ولكەتانۋ مۇراجايىنىڭ ماماندارى 19- عاسىردىڭ سوڭىندا قىستاق بولعان جەردە سايكەسىنشە ىشكى جابدىقتارى بار شىمدى توپىراق توبەسى بار ءۇي، مالعا ارنالعان قاشا ورناتۋدى جوسپارلاپ وتىر.

سونىمەن قاتار توقىما توقيتىن ستانوك پەن ءجۇن تازارتۋعا ارنالعان، اس ازىرلەيتىن اۋماق: وت ۇستىندەگى قازان جانە وتپەن قايناتىلاتىن ساماۋرىن قوياتىن تۇرمىستىق ورىن قاراستىرىلادى.

كەلۋشىلەر سامان جانە ءشيتتى كىرپىش قۇيىپ، ءجۇن تازالاپ، توقىما توقي الادى. قىستاقتىڭ تۇرمىستىق اۋماعى مۇراعاتتىق سۋرەتتەر مەن دەرەك كوزدەرىنە نەگىزدەلىپ قۇرىلعان. سونىمەن قاتار مۇندا تەمىرتاۋ تاريحي-ولكەتانۋ مۇراجايىنىڭ قورىنان الىنعان قازاق حالقىنىڭ تۇرمىسى مەن مادەنيەتىن كورسەتەتىن بىرەگەي جادىگەرلەر دە قويىلادى.

تاريحشىلاردىڭ مالىمدەۋىنشە، جاڭعىز توبە جانە جۇماق دوڭدەرىنىڭ ماڭىنداعى جەرلەر (قازىر ول سامارقاند سۋ قويماسىنداعى ارال مەن جارتىلاي ارال) ارعىن رۋىنان شىققان توتىعۇلدىڭ ورازبەك، نيازبەك جانە تۇرلىبەكتىڭ قىستاۋلارى بولعان. اقساقالداردىڭ ايتۋىنشا، اۋىلدار بۇل جەردە كەم دەگەندە 1820-جىلداردان بەرى قىستاعان.

«جاۋىرتاۋداعى كەزدەسۋ» فەستيۆالىنە تەمىرتاۋ، اباي، ساران، قاراعاندى جانە شاحتينسك قالالارىنان جينالاتىن 100 دەن استام بەلسەندىلەر قاتىسادى. ولار ءۇشىن سەمينارلار مەن ترەنينگتەر، ينتەراكتيۆتى ويىندار مەن ۆيكتورينالار ۇيىمداستىرىلادى.

مەرەكە قالا كۇنىن، ياعني تەمىرتاۋدىڭ 73 جىلدىعىن تويلاۋعا ورايلاستىرىلادى.