قىرعىزستاندا قىلمىستىق توپتىڭ باسشىسى دەلىنگەن قازاقستاندىق ۇستالدى

 استانا. قازاقپارات - قىرعىزستاننىڭ ءى ءى م جەدەل قىزمەتىنىڭ وكىلدەرى «ماكس» لاقاپ اتىمەن تانىمال، ترانس ۇلتتىق قىلمىستىق توپتىڭ باسشىسى دەلىنگەن قازاقستاندىق مۇرات نيازوۆتى ۇستادى، - دەپ حابارلايدى Tengrinews.kz ءتىلشىسى.

قىرعىزستاننىڭ پوليتسياسى ينتەرپولدىڭ كۇدىكتىگە ىزدەۋ جاريالاعانىن جانە ونىڭ قاتىگەزدىكپەن اسا اۋىر قىلمىستار جاسادى دەگەن كۇدىككە ىلىنگەنىن حابارلادى.

ايتا كەتەيىك، نيازوۆ ق ر قىلمىستىق كودەكسىنىڭ 194، 367، 262-باپتارى بويىنشا قازاقستاندا سىرتتاي سوتتالعان بولاتىن.

مۇرات نيازوۆقا 2015-جىلى ىزدەۋ جاريالانعان بولاتىن. وعان قازاقستان رەسپۋبليكاسىنىڭ ۇ ق ك وكىلدەرى باستاماشى بولعان ەدى. وسىلايشا نيازوۆ 22- قىركۇيەكتە بىشكەك ماڭىندا ۇستالدى. قازىرگى ۋاقىتتا يزولياتورعا قامالدى.