تۇراقتى ايلىعى جوق يمامداردىڭ ماسەلەسى شەشىلەدى

 استانا. قازاقپارات - سەناتتىڭ الەۋمەتتىك- مادەني دامۋ جانە عىلىم كوميتەتىنىڭ كەڭەيتىلگەن وتىرىسىندا قر قوعامدىق دامۋ ۆيتسە- ءمينيسترى بەرىك ارىن تۇراقتى ايلىعى جوق يمامدارعا قولداۋ كورسەتۋ شارالارى پىسىقتالىپ جاتقانىن ءمالىم ەتتى، دەپ حابارلايدى قازاقپارات.

«ءدىني باسقارمانىڭ ىشكى ەرەجەلەرىنە سايكەس، مەشىتتەرگە تۇسەتىن قاراجاتتىڭ 30 پايىزى ورتالىققا باعىتتالادى. ويتكەنى وزدەرىنىڭ اكىمشىلىك شىعىندارى بار، ايلىق تولەنەدى. ءبىراق، كەيبىر اۋىلدىق جەرلەردە مۇلدەم اقشا تۇسپەيتىن مەشىتتەر بار ەكەنىن بىلەمىز، سايكەسىنشە ولاردىڭ جاعدايى دا وتە ناشار. بۇل تۇرعىدا قول قۋسىرىپ وتىرعان جوقپىز. بىلتىر «ۋاقىپ» كورپوراتيۆتىك قايىرىمدىلىق قورى قۇرىلعان بولاتىن، سول قوردىڭ تۇسكەن قارجىسىنىڭ اياسىندا ەلىمىز بويىنشا 355 شالعاي اۋىلدارداعى جانە تۇرمەدە ەكسترەميزم مەن لاڭكەستىك باپتارى بويىنشا سوتتالعاندارمەن جۇمىس ىستەيتىن يمامدارعا ايىنا 50 دەن 80 مىڭ تەڭگەگە دەيىن ۇستەمەاقى تولەپ وتىرمىز» ، - دەدى بەرىك ارىن.

سونىمەن قاتار ول ايلىقسىز جۇمىس ىستەپ جاتقان مەشىت قىزمەتكەرلەرىنە قولداۋ جاساۋ شارالارى قارالىپ جاتقانىن جەتكىزدى.

 «جاز بويى جۇمىس ىستەپ، بۇكىل مەشىتتەر بويىنشا ەسەپ- قيساپ جۇرگىزدىك. ولاردا تۇراقتى ايلىق الاتىن 30 پايىز عانا يمام بار. 70 پايىزىندا تۇراقتى ايلىق جوق. بۇل ماسەلەنى تۇپكىلىكتى شەشۋ جولىندا ۇكىمەتكە ءتيىستى ۇسىنىستارمەن شىقتىق. وسى ورايدا ناقتى جۇمىستارمەن اينالىساتىن ادامداردىڭ ماسەلەسىن شەشۋ ەسكەرىلگەن» ، - دەدى ۆيتسە- مينيستر.

 

ايتا كەتەيىك، الەۋمەتتىك- مادەني دامۋ جانە عىلىم كوميتەتىنىڭ كەڭەيتىلگەن وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ءدىني قىزمەت جانە ءدىني بىرلەستىكتەر ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تالقىلاندى. جوبادا مەملەكەتتىك قىزمەتشىلەردىڭ ءدىن سالاسىنداعى ادەبىنە بايلانىستى ءبىرقاتار تالاپتار ناقتىلانعان.