قازاقستاندا قاي سالادا جەمقورلىق ءجيى ورىن الادى؟
«مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى سىبايلاس جەمقورلىقتىڭ كەز كەلگەن كورىنىسىن قابىلداماۋدى قالىپتاستىرۋعا ەرەكشە كوڭىل ءبولىپ وتىر. وسى جۇمىستى جۇيەلى تۇردە جۇرگىزۋ ناتيجەسىندە ازاماتتىق قوعام بەلسەندىلىگى ارتىپ، جاس ۇرپاقتىڭ قۇندىلىقتارى ترانسفورماتسيالانعانىن اتاپ ءوتۋ كەرەك. وسى جىلدىڭ 8 ايىندا سىبايلاس جەمقورلىققا قاتىستى قۇرىلىس سالاسىندا - 157، ءبىلىم بەرۋ - 110، جەر تەلىمى - 101، اۋىل شارۋاشىلىعى سالاسىندا 95 ءىس قوزعالدى. وسى اتالعان ىستەردىڭ 112 ءسى استانادا تىركەلگەن»، - دەدى ۇلتتىق بيۋرو ورتالىعىندا وتكەن باسپا ءسوز ءماسليحاتىندا اتالعان ۇيىمنىڭ رەسمي وكىلى جاننا باستاروۆا.
رەسمي وكىلدىڭ ايتۋىنشا، جىل باسىنان بەرى 511 تەكسەرۋ جۇرگىزىلىپ، 100 مىڭنان استام زاڭ بۇزۋشىلىق انىقتالعان. وتكەن جىلدىڭ سايكەس كەزەڭىمەن سالىستىرعاندا، زاڭ بۇزۋشىلىقتار سانى 2 ەسە ازايدى. ياعني، 230 مىڭنان 100 مىڭعا دەيىن تومەندەگەن.
ودان بولەك، ۇستىمىزدەگى جىلى مەملەكەتتىك ورگانداردىڭ 5 لاۋازىمدى تۇلعاسى جۇمىستان بوساتىلدى. 2018-جىلدىڭ 8 ايىندا ا ق ب ت ك 465-بابى بويىنشا اكىمشىلىك قۇقىق بۇزۋشىلىقتار جونىندە 257 حاتتاما جاسالىپ، 123 لاۋازىمدى تۇلعا اكىمشىلىك جاۋاپكەرشىلىككە تارتىلدى.
جاۋاپكەرشىلىككە تارتىلعانداردىڭ %52 مەملەكەتتىك قىزمەتشىلەر، %41 باعىنىستى ۇيىم قىزمەتكەرلەرى، ال %7 اسكەري قىزمەتشىلەر. بۇل جاعدايلاردىڭ باسىم كوپشىلىگى الماتى (%17)، قوستاناي جانە قاراعاندى (%9) وبلىستارىنا تيەسىلى.