ساعىنتايەۆ ماسىموۆكە: ۇيالى تەلەفونىمىزدى شىنجىرعا بايلاپ الۋىمىز كەرەك پە

 استانا. قازاقپارات - بۇگىن ۇكىمەتتىڭ سەلەكتورلىق رەجىمدەگى وتىرىسىندا ق ر پرەمەر- ءمينيسترى باقىتجان ساعىنتايەۆ الماتىدا ۇيالى تەلەفون ۇرلىعى ءورشىپ تۇرعانىن اتاپ ءوتتى. سونداي- اق الماتى قالالىق ىشكى ىستەر دەپارتامەنتىنە بۇل ماسەلەنى تۇبەگەيلى شەشۋدى تاپسىردى، دەپ حابارلايدى قازاقپارات ءتىلشىسى.

وتىرىس بارىسىندا الماتى قالالىق ىشكى ىستەر دەپارتامەنتى باستىعىنىڭ مىندەتىن اتقارۋشى نۇرلان ءماسىموۆ وڭتۇستىك استانادا قازىرگى ۋاقىتتا قىلمىس ازايىپ، ولاردىڭ اشىلۋى ارتا تۇسكەندىگىن ايتتى.

«جاسالاتىن قىلمىستاردىڭ 70 پايىزىن ۇرلىق قۇرايدى. ولار كوبىنە كۇندىزگى ۋاقىتتا جاسالادى. سوندىقتان پاترۋلدىك پوليتسيا جاياۋ جاساققا كوشىرىلدى. اسا اۋىر قىلمىستار  18, اۋىر قىلمىستار  15, ادام ءولتىرۋ 33 پايىزعا تومەندەدى» ، - دەدى ول.

 «رەسپۋبليكادا جاسالاتىن قىلمىستاردىڭ 20 پايىزى الماتى قالاسىنىڭ ۇلەسىنە تيەسىلى. حالقىنىڭ سانى دا كوپ. دەگەنمەن، وتە ۇلكەن كورسەتكىش، قۋانتارلىق جاعداي ەمەس. تومەن ءتۇسىرۋ كەرەك. ۇيالى تەلەفونداردى ۇرلاۋ وتە كوپ. سوعان نە جاۋاپ بەرەسىز؟ » ، - دەدى پرەمەر- مينيستر ءوز كەزەگىندە.

دەپارتامەنت باسشىسىنىڭ ايتۋىنشا، ۇيالى تەلەفون ۇرلىعىنا قاتىستى ءاربىر قىلمىس تىركەلەدى. دەگەنمەن، ۇيالى تەلەفون ۇرلىعىنىڭ 70 پايىزىن يەلەرىنىڭ ونى قالدىرىپ كەتۋىنەن ورىن الۋدا.

 «ءبىر- ەكى كۇننەن كەيىن كەلىپ ارىز جازادى، ناقتى ورنىن كورسەتە المايدى» ، - دەدى نۇرلان ءماسىموۆ.

ونىڭ مۇنداي جاۋابى پرەمەر- ءمينيستردىڭ كوڭىلىنەن شىققان جوق.

 «ۇرلىقتاردىڭ ءاربىر بەسىنشىسى ۇيالى تەلەفونداردىڭ جىمقىرىلۋىنا بايلانىستى بولىپ وتىر. سوندا بۇكىل حالىق كىنالى عوي، تەلەفوندارىن تاستاپ كەتەدى. ەشكىم ۇرلاپ جاتقان جوق، وزدەرى تاستاپ كەتەتىن بولعانى عوي. وندا ءسىزدىڭ ويىڭىزشا، شىنجىرعا بايلاپ، قالتامىزعا سالىپ ءجۇرۋىمىز كەرەك بولعانى عوي. وتكەندە اۆتوكولىك بولشەكتەرى بويىنشا كوپ ايتىلدى. ولاردى ساتاتىن ورىندار بار. تامىز ايىندا ءبىراز رەيد جاسادىڭىزدار. تۋرا سونداي ۇرلانعان ۇيالى تەلەفونداردى ساتاتىن ورىندار كوپ. ساتاتىن ورىن بولعاننان كەيىن ۇرلايدى. وسى باعىتتا نە جاساپ جاتىرسىزدار؟ » ، - دەپ سۇرادى باقىتجان ساعىنتايەۆ.

 «باقىتجان ءابدىر ۇلى، وتە دۇرىس ايتتىڭىز، سۇرانىس ۇسىنىستى تۋىنداتادى. قازىر اتالعان ساۋدا نۇكتەلەرىن قاراستىرىپ جاتىرمىز. اتالعان نۇكتەلەر ساۋدا ۇيلەرىندە ورنالاسقان. ءبىز ولارعا رەيد جۇرگىزىپ، ۇرلانعان تەلەفونداردى تاركىلەيمىز. سودان كەيىن ول دۇڭگىرشەكتەردى جاۋىپ، قوجايىندارىمەن اڭگىمەلەسۋ وتكىزەمىز. قازىر ناتيجەسى بايقالا باستادى» ، - دەدى دەپارتامەنت باسشىسى.