استىقتى دەر ۋاقىتىندا جيناماساق ۇلكەن شىعىن بولۋى مۇمكىن - ءو. شوكەيەۆ

استانا. قازاقپارات - استىقتى دەر ۋاقىتىندا جيناماساق ۇلكەن شىعىن بولۋى مۇمكىن. بۇل تۋرالى بۇگىن ق ر ۇكىمەتىنىڭ سەلەكتورلىق رەجىمدەگى وتىرىسىندا ق ر پرەمەر- ءمينيسترىنىڭ ورىنباسارى - اۋىل شارۋاشىلىعى ءمينيسترى ءومىرزاق شوكەيەۆ ايتتى، دەپ حابارلايدى قازاقپارات ءتىلشىسى.

«جاۋىن شاشىن ەگىن جيناۋ ناۋقانىنا ءبىراز كەدەرگى كەلتىرىپ وتىر. سوعان قاراماستان وڭىرلەردە قارقىندى جۇمىس جۇرگىزىلۋدە. بۇگىنگى تاڭدا ەگىستىك القاپتارىنىڭ 73 پايىزى باستىرىلىپ، 14 ميلليون توننادان استام استىق جينالدى. ونىڭ ىشىندە قوستاناي وبلىسى 85 پايىزدان اسىپ، بىلتىرعى دەڭگەيگە جاقىنداپ قالدى. س ق و- دا 70,8 پايىز باستىرىلدى»، - دەدى ول.

ونىڭ دەرەگىنشە، ەگىن باستىرۋ جۇمىستارىندا ارتتا كەلە جاتقان وڭىرلەر دە بار. ماسەلەن، اقمولا وبلىسى استىق القابىنىڭ - 60، قاراعاندى وبلىسى - 57، پاۆلودار وبلىسى 58 پايىزىن عانا باستىرىپ ۇلگەرگەن.

 «الدىڭعى اپتادا اۋا رايىنىڭ بولجامى جاقسى، وسىنى پايدالانىپ، ەكى- ءۇش وبلىستىڭ اكىمدەرى قوسىمشا شارالاردى قولعا الۋى كەرەك. ويتكەنى، بۇل استىقتى جيناپ الماساق، ۇلكەن شىعىن بولۋى مۇمكىن. جالپى شىعىمى جامان ەمەس، ءتۇسىمى گەكتارىنا 13 سەنتنەردەن اينالۋدا. الدا ورىلاتىن القاپتار ءتۇسىمى جوعارى بولۋى ءتيىس. سوندىقتان كورسەتكىشتى ارتتىرۋعا مۇمكىندىك بار»، - دەدى ءومىرزاق شوكەيەۆ.

اۆتور: مارلان جيەمباي