مەملەكەتتىك قىزمەتشىلەردىڭ ءدىن سالاسىنداعى ادەبىنە بايلانىستى تالاپتار ناقتىلاندى

استانا. قازاقپارات - سەناتتىڭ الەۋمەتتىك- مادەني دامۋ جانە عىلىم كوميتەتىنىڭ كەڭەيتىلگەن وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ءدىني قىزمەت جانە ءدىني بىرلەستىكتەر ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تالقىلاندى، دەپ حابارلايدى قازاقپارات ءتىلشىسى.

زاڭ جوباسىنىڭ ەڭ ماڭىزدى نورمالارى شارتتى تۇردە ءۇش بلوكقا بولىنگەن. ونىڭ العاشقىسىنا ءدىندى دەسترۋكتيۆتى ماقساتتارعا قولدانۋعا جول بەرمەۋگە باعىتتالعان تۇزەتۋلەر كىرەدى.

 «اتاپ ايتقاندا، «دەسترۋكتيۆتى ءدىني اعىم» جانە «ءدىني راديكاليزم» دەگەن جاڭا ۇعىمدار ەنگىزىلەدى. بۇل ۇعىمداردى ەنگىزۋ جانە دەسترۋكتيۆتى ءدىني اعىمداردىڭ يدەولوگياسىن، اتريبۋتتارى مەن سىرتقى بەلگىلەرىن تاراتۋعا تىيىم سالۋ ارقىلى سىرتتان ەلىمىزگە جات يدەولوگيانىڭ ەنۋىنە توسقاۋىل قويۋعا مۇمكىندىك بەرەدى. سونداي- اق جوبادا بەت- الپەتتى تانۋعا كەدەرگى كەلتىرەتىن كيىم- كەشەكتى قوعامدىق ورىنداردا كيىپ جۇرۋگە تىيىم سالۋ كوزدەلگەن. مۇنداي شارالاردى ەنگىزۋ ازاماتتاردىڭ قاۋىپسىزدىگى ءۇشىن قاجەت. وسى تەكتەس نورمالار بەلگيانىڭ، فرانسيانىڭ، بولگاريانىڭ، اۆستريانىڭ جانە باسقا دا ءبىرقاتار مەملەكەتتەردىڭ زاڭدارىندا قولدانىلادى. بۇل نورما دىنگە عانا قاتىستى ەمەس، سول سەبەپتى ول «قۇقىق بۇزۋشىلىقتىڭ الدىن الۋ تۋرالى» زاڭعا ەنگىزىلىپ وتىر»، - دەدى ق ر قوعامدىق دامۋ ۆيتسە- ءمينيسترى بەرىك ارىن.

سونىمەن قاتار جوبادا مەملەكەتتىك قىزمەتشىلەردىڭ ءدىن سالاسىنداعى ادەبىنە بايلانىستى ءبىرقاتار تالاپتار ناقتىلانعان. جوباعا مەملەكەتتىك قىزمەتشىلەردىڭ ادەپ كودەكسىندە كوزدەلگەن ءۇش شەكتەۋ ەنگىزىلگەن. ولار: ءوزىنىڭ قىزمەتتىك مۇمكىندىكتەرىن ءدىني بىرلەستىكتەردىڭ مۇددەلەرىنە پايدالانباۋ، وزىنە باعىنىستاعى قىزمەتشىلەردى ءدىني قىزمەتكە ماجبۇرلەمەۋ، ءدىني بىرلەستىكتى قۇرۋعا باستاماشى نەمەسە ونىڭ مۇشەسى بولماۋ.

 عيبادات ۇيلەرىنەن تىس جەرلەردە نەكەنى قيۋ نەمەسە توقتاتۋ بويىنشا ءدىني جورالعىلار مەن راسىمدەردى جاساۋعا جول بەرمەۋ ەسكەرىلگەن. ءدىني جولمەن نەكەگە تۇرۋعا نيەت بىلدىرگەن ادامداردىڭ بىرەۋى عيبادات عيماراتىنا كەلە المايتىن جاعدايدا (اۋىر ناۋقاستانۋى، مۇگەدەكتىگى، باس بوستاندىعىنان ايىرۋ ورىندارىندا بولۋى)، بۇل ءدىني ءراسىمدى مەديتسينالىق نەمەسە وزگە دە ۇيىمدا نەكەگە وتىراتىن ادامداردىڭ قاتىسۋىمەن تىركەلگەن ءدىني بىرلەستىكتىڭ وكىلى جۇرگىزە الادى.

«كامەلەتكە تولماعانداردى ءدىني قىزمەتكە زاڭسىز تارتۋدان قورعاۋ دەڭگەيى كۇشەيەدى»، - دەدى ۆيسە- مينيستر.

تالقىلاۋدان كەيىن كوميتەت مۇشەلەرى زاڭ جوباسىن سەناتتىڭ جالپى وتىرىسىنا ءبىرىنشى وقىلىمعا شىعارۋ تۋرالى شەشىمدى قابىلدادى.

اۆتور: رۋسلان عابباسوۆ