ساعىنتايەۆتىڭ اتىراۋ ءى ءى د باستىعىنا: ايلىق كوبەيمەسە قىلمىسپەن كۇرەسپەيمىز بە

استانا. قازاقپارات - بۇگىن ۇكىمەتتىڭ سەلەكتورلىق رەجىمدەگى وتىرىسىندا پرەمەر- مينيستر باقىتجان ساعىنتايەۆ اتىراۋ وبلىستىق ءى  ءى د باستىعى ايان دۇيسەنبايەۆقا ادام ومىرىنە نەمقۇرايلى قاراماۋدى ەسكەرتتى، دەپ حابارلايدى قازاقپارات ءتىلشىسى.

 جيىن بارىسىندا ۇكىمەت باسشىسى 2018 -جىلدىڭ سەگىز ايىندا اتىراۋ وبلىسىندا اسا اۋىر قىلمىستار - 44، ادام ءولتىرۋ - 6,7، توناۋ - 42,9، زورلىق جاساۋ - 6,1 جانە جول- كولىك وقيعالارىندا مەرت بولعاندار سانى 43 پايىزعا ارتقانىن ايتتى. سونىمەن قاتار اتىراۋ وبلىستىق ىشكى ىستەر دەپارتامەنتىنىڭ باستىعى ايان دۇيسەنبايەۆتىڭ ەسەبىن تىڭداعان بولاتىن.

 ونىڭ ايتۋىنشا، اتىراۋ وبلىسىندا اسا اۋىر قىلمىستار تەك قانا 1, 2 جانە 3 بىرلىككە عانا وسكەن. دەگەنمەن، پايىزعا شاققاندا كوپ بولىپ كورىنىپ تۇر. ماسەلەن، بىلتىر 25 ادام ءولىمى، بيىل 26 ادام ءولىمى تىركەلگەن.

«وبلىس ورتالىعىندا قىلمىستىڭ ارتۋىنا سەبەپ حالىق سانىنىڭ ءوسۋى بولىپ وتىر. ماسەلەن، سوڭعى 5 -جىلدا اتىراۋ قالاسىنىڭ حالىق سانى 100 مىڭ ادامعا كوبەيگەن... جول- كولىك وقيعالارىنىڭ وسۋىنە قاتىستى ايتار بولسام، اتىراۋدا سوڭعى 5 جىلدا كولىك سانى 96 مىڭنان 150 مىڭعا دەيىن ءوستى» ، - دەدى ول.

وسى رەتتە باقىتجان ساعىنتايەۆ بوس تۇرعان 10 پايىز ۆاكانسيا قىسقارتىلىپ، ۇنەمدەلگەن قاراجات جالاقىنى كوتەرۋگە جۇمسالاتىندىعىن اتاپ ءوتتى.

«ال، ءسىز كادر جەتپەيدى دەيسىز. ۆاكانسيانى قىسقارتسا قالاي جۇمىس ىستەيسىز؟ »، - دەپ سۇرادى پرەمەر- مينيستر دەپارتامەنت باسشىسىنان.

 «قىسقارسا، قىزمەتكەرلەرىمىزدىڭ جالاقىسى كوبەيەدى عوي. جۇكتەمە نورماسى شامالى وسەتىن بولار. ىستەيمىز، شامامىز بار، قاداعالايمىز. مينيستردەن قانداي شەشىم بولادى، قولدايمىز»، - دەپ جاۋاپ بەردى ول.

 «ءمينيستردىڭ شەشىمى قانداي بولادى، دۇرىس اسكەري قىزمەتشى عوي. اقشا بەرسە قىلمىستى توقتاتامىز. ال ايلىق بەرمەسە، ايلىقتى كوبەيتپەسە قىلمىسپەن كۇرەسپەيمىز. ءسىزدىڭ جاۋابىڭىز تۋرا سولاي بولدى. ءسىز ادام ومىرىنە قىزىق قارايسىز. بىلتىر 25 ادام، بيىل 26 ادام ولگەن دەيسىز. ءبىر ادام بولسا دا ول ادامنىڭ ءومىرى، جەڭىلدىكپەن قاراۋعا بولمايدى»، - دەپ ەسكەرتتى باقىتجان ساعىنتايەۆ ايان دۇيسەنبايەۆقا.

اۆتور: مارلان جيەمباي