قالمۇحانبەت قاسىموۆ ەلباسى تاپسىرماسىن ورىنداي الماي جاتقانىن ايتتى

استانا. قازاقپارات - پوليتسيانى جەكە ۆيدەوتىركەۋىشتەرمەن جابدىقتاۋ تۋرالى ەلباسىنىڭ تاپسىرماسى تولىق ورىندالمادى. بۇل تۋرالى بۇگىن ۇكىمەتتىڭ سەلەكتورلىق رەجىمدەگى وتىرىسىندا ق ر ىشكى ىستەر ءمينيسترى قالمۇحانبەت قاسىموۆ ايتتى، دەپ حابارلايدى قازاقپارات ءتىلشىسى.

 ءمينيستردىڭ ايتۋىنشا، بيىل جالپى العاندا كوپتەگەن قىلمىس تۇرلەرى تومەندەدى. اسا اۋىر، اۋىر، سونداي- اق اۋىرلىعى ورتاشا قىلمىس تۇرلەرىنىڭ سانى ازايدى. ونىڭ ىشىندە ۇرلىق، توناۋ، بۇزاقىلىق، زورلاۋ جانە باسقا دا قىلمىستار، بۇرىن سوتتالعاندار، كامەلەتكە تولماعاندار جاساعان قىلمىستار ازايۋدا. قوعامدىق ورىندارداعى قىلمىس، ونىڭ ىشىندە كوشەلەردە ماس كۇيدە جاسالاتىن قىلمىستار دا تومەندەدى.

 «ارينە، وسى جانە باسقا دا جاعىمدى ۇدەرىستەر مينيسترلىكتىڭ، جەرگىلىكتى پوليتسيانىڭ اكىمدىكتەرمەن بىرلەسە اتقارعان جۇمىستارىنىڭ ناتيجەسى. بۇل - قۇقىق بۇزۋشىلىق پروفيلاكتيكاسى، قوعامدىق ءتارتىپتى ساقتاۋ، جول قوزعالىسى قاۋىپسىزدىگىن قامتاماسىز ەتۋ جۇمىستارى. مۇنىڭ بارلىعىنا جەرگىلكتى پوليتسيا جاۋاپتى. ولاردىڭ سانى 25 مىڭ ادام، اراسىندا ۋچاسكەلىك پوليتسيا ينسپەكتورلارى، جول- پاترۋلدىك ينسپەكتورلار، يۋۆەنالدىق، تابيعاتتى قورعاۋ پوليتسياسى بار»، - دەدى ول.

قاسىموۆتىڭ ايتۋىنشا، جەرگىلىكتى پوليتسيانى قۇرعان كەزدەن باستاپ ماتەريالدىق بازاسى جاقسارتىلدى. اكىمدىكتەردىڭ قولداۋىمەن اۆتوكولىكتەرمەن، راتسيالارمەن، كومپيۋتەرلىك تەحنيكامەن كۇشەيتىلدى. 2016-2017 -جىلدارى جەرگىلىكتى پوليتسيانى جابدىقتاۋعا جەرگىلىكتى بيۋدجەتتەن 6,5 ميلليارد تەڭگەدەن استام قارجى بولىنگەن.

 «سونىمەن بىرگە مەملەكەت باسشىسىنىڭ پوليتسيانى جەكە ۆيدەوتىركەۋىشتەرمەن جابدىقتاۋ تاپسىرماسى ءالى دە تولىق كولەمدە ورىندالماعانىن اتاپ ايتۋىما تۋرا كەلەدى. جول- پاترۋلدىك پوليتسيانىڭ كادرلىق جاعدايىن جاقسارتۋ ءۇشىن شارالار قابىلدانۋدا»، - دەدى مينيستر.

اۆتور: مارلان جيەمباي