سەمەيدەگى كيىز باسۋ كومبيناتى شيكىزاتقا ءزارۋ
كاسىپورىن جەتەكشىسى حاريس سايفۋتدينوۆتىڭ ايتۋىنشا، وڭىردەگى ءجۇننىڭ باسىم كوپشىلىگى قىتاي، تۇركيا باستاعان شەتەلدەرگە شىعارىلادى. سونىڭ كەسىرىنەن جاڭعىرتۋدان ءوتىپ، جاڭا سەحتار اشقان مەكەمە تولىق قۋاتىنا شىعا الماي وتىر.
بيىل وندىرىسكە قاجەت 400 توننا شيكىزاتتىڭ تەك 80 تونناسى جينالعان. كومبينات قازىر كۇنىنە 20-30 جۇپ قانا وتاندىق ءونىم شىعارۋعا ءماجبۇر.
حاريس سايفۋتدينوۆ، كيىز باسۋ كومبيناتىنىڭ قۇرىلتايشىسى:
- ەگەر ءوز نارىعىمىزدى ناقتى دامىسىن دەسەك، ءجۇن مەن تەرى شيكىزاتىن شەتەلگە شىعارۋدى توقتاتۋ كەرەك. نەمەسە بەلگىلى ءبىر مولشەردە شەكتەۋ قويعان ءجون. ماسەلەن، ءبىز قازىر تولىق قۋاتىمىزدا جۇمىس ىستەسەك، 400 توننا ءجۇن وڭدەي الامىز. جۇمىس ورىندارى دا 2-3 ەسەگە دەيىن كوبەيەتىن ەدى. الايدا شيكىزات تاپشىلىعى قولبايلاۋ بولىپ وتىر.
ال باتىس قازاقستان وبلىسىنداعى بىلتىر ىسكە قوسىلعان تەرى وڭدەۋ كاسىپورنىندا دا وسىعان ۇقساس جاعداي؛. ءوندىرىس وشاعى قۋاتىنىڭ ۇشتەن ءبىرىن عانا پايدالانىپ وتىر. يندۋستريالاندىرۋ كارتاسىنا ەنگەن كاسىپورىن تاۋلىگىنە 2500-دەي ءىرى قارا مەن قوي تەرىسىن وڭدەي الادى. ونداعى ىلعال تەرىدەن جاسالاتىن جارتىلاي فابريكاتتار يسپانيا مەن يتاليا ەلدەرىنە ەكسپورتتالادى. كاسىپورىندا ەر ادامدارعا ارنالعان اياق كيىم تىگۋ ءىسى دە قولعا الىندى. جىل سوڭىنا دەيىن زاۋىت قۋات كولەمىن %50- عا جەتكىزۋدى جوسپارلاپ وتىر.
«جەرگىلىكتى شيكىزاتتىڭ ساپاسى وتە جاقسى، قالىڭدىعى دا تالاپقا ساي كەلەدى. تەك قاجەتتى مولشەردە، بۇلىنبەي جەتسە بولعانى»، - دەيدى زاۋىت ماماندارى.
اسەت بەكتۇرعانوۆ، كاسىپورىننىڭ كوممەرتسيالىق ديرەكتورى:
- مالدى قولمەن سويعان كەزدە تەرىنىڭ كوپ بولىگى زاقىمدالادى. ال مەحانيكالىق جەلىلەرى بار كاسىپورىندار تىم از. ەڭ باستى پروبلەما - تۇرعىنداردىڭ دەنى مالدىڭ ەتى مەن سۇتىنە عانا كوڭىل بولەدى دە تەرىگە كەيىن وندىرىستە اسا قاجەت بولاتىن ءونىم رەتىندە قارامايدى. ءتىپتى مالدىڭ تەرىسىنە باسىلاتىن ەن تاڭبانىڭ دا شيكىزات ساپاسىنا كەرى اسەر ەتەتىنى راس. سونىمەن قاتار اياق تىگۋدى مەڭگەرگەن تىگىنشىلەر بولعانىمەن، جوعارى دەڭگەيلى تەحنولوگ ماماندار دا تاپشى.
www.24.kz