شىعىس قازاقستانداعى ەمحانالار حالىقارالىق دەڭگەيدەگى قۇرالدارمەن جابدىقتالادى
سوڭعى ەكى جىلدا وسى باعىتتاعى جۇمىستارعا ايماقتا شامامەن 19 ميلليارد تەڭگە جۇمسالعان. كەلەر جىلى تاعى 6 ميلليارد تەڭگە بولىنبەك. بۇل تۋرالى زىريان اۋدانىن ارالاپ، ونداعى ينسۋلت ورتالىعىنىڭ جۇمىسىمەن تانىسقان وبلىس اكىمى دانيال احمەتوۆ مالىمدەدى.
زىريان قالاسىندا اشىلعان ينسۋلت ورتالىعى قىركۇيەكتىڭ باسىندا عانا رەسمي جۇمىسىن باستادى. سودان بەرى 24 سىرقاتقا مەديتسينالىق كومەك كورسەتىپ ۇلگەردى. 558 ميلليون تەڭگەگە ەڭ سوڭعى ۇلگىدەگى تەحنولوگيالار قويىلعان مەكەمە 15 ورىنعا ارنالعان. بۇنداعى زامانۋي قۇرالداردى يگەرۋگە اۋداندىق اۋرۋحانا باسشىلىعى الدىن الا ازىرلىك جاساپتى.
ۆلاديمير كوروبكين، زىريان اۋداندىق ورتالىق اۋرۋحاناسىنىڭ باس دارىگەرى:
- كادر تاپشىلىعى جوق، دەگەنمەن جاستاردى وقىتۋعا دايىنبىز. ويتكەنى سوڭعى مەديتسينالىق تەحنولوگيالارمەن جابدىقتالعان مەكەمەدە جۇمىس ىستەۋگە نيەت ءبىلدىرىپ جاتقان جاس ماماندار وتە كوپ.
ورتالىق زىريان اۋدانىمەن قاتار كورشىلەس كۇرشىم، قاتونقاراعاي ايماعىن قوسا العاندا 120 مىڭداي تۇرعىنعا مەديتسينالىق جاردەم بەرۋگە قاۋقارلى. وبلىس اكىمى حالىق دەنساۋلىعىن جاقسارتۋعا ارنالعان بۇنداي وزىق مەكەمەنىڭ باس دارىگەرىنەن باستاپ بۇكىل ۇجىمى بىلىكتىلىكتەرىن ارتتىرۋ كەرەك دەپ سانايدى.
دانيال احمەتوۆ، وبلىس اكىمى:
- بارلىق اۋداننىڭ باس دارىگەرلەرى كەلەسى جىلدان باستاپ بىلىكتىلىكتەرىن شىڭدايتىن بولادى. توموگرافيا، انگيوگرافيا سىندى كۇردەلى تەحنولوگيامەن جۇمىس جاسايتىن ماماندار دا بىلىمدەرىن تەرەڭدەتۋ كەرەك. وسىلايشا، 3 جىلدان سوڭ بۇل جەر كورشىلەس ەلدىڭ نوۆوسىبىر، كەمەر قالالارىنداعى اۋرۋحانالاردان اسىپ تۇسەتىن مەديتسينالىق مەكەمەگە اينالادى.
زىريان اۋداندىق ماسليحاتىمەن كەزدەسۋىندە وبلىس باسشىسى اۋدان اتىن التاي دەپ وزگەرتۋ تۋرالى ءوز ويىن دا ورتاعا سالدى. دانيال احمەتوۆتىڭ ايتۋىنشا، بۇل تاريحي نەگىزى بار، ەكونوميكالىق بولاشاعى زور قادام بولماق. جيىنعا قاتىسۋشىلار اتالعان باستاماعا ەرەكەشە قولداۋ بىلدىرەتىندىكتەرىن جەتكىزدى. ەندى بۇل سۇراق حالىقتىڭ پىكىرىن ەسكەرە وتىرىپ، وناماستيكالىق كوميسسيا قاراۋىنا تۇسەدى.
www.24.kz