تۇركىستان وبلىسىنىڭ اكىمى ءبىر توپ ارداگەرلەرىمەن كەزدەستى

تۇركىستان. قازاقپارات - تۇركىستان وبلىسىنىڭ اكىمى جانسەيىت تۇيمەبايەۆ قارتتار كۇنى قارساڭىندا ءبىر توپ ارداگەرلەرىمەن كەزدەستى. باسقوسۋدا ايماق باسشىسى ەل اعالارىن مەرەكەمەن قۇتتىقتاپ، وبلىس ورتالىعىن رۋحاني تۇرعىدان دامىتۋعا بىرلەسىپ اتسالىسۋعا شاقىردى، دەپ حابارلايدى قازاقپارات ءتىلشىسى.

كەزدەسۋ بارىسىندا ءوڭىر باسشىسى تۇركىستاندى تۇلەتۋگە ەلباسىمىز ايرىقشا نازار اۋدارىپ وتىرعانىن اتاپ ءوتتى.

«وبلىس ورتالىعى الداعى ۋاقىتتا جاڭا كەيىپكە ەنەدى. الداعى ۋاقىتتا تۇركىستاندا جاڭا عيماراتتار، تۇرعىن ۇيلەر، اۋەجاي، اكىمشىلىك ىسكەرلىك ورتالىق بوي كوتەرەتىن بولادى. تۇركى دۇنيەسىنىڭ ورتالىعى رەتىندە بارلىق جاعىنان ساي بولماق . سونىمەن قاتار، تۇركىستان - رۋحانياتتىڭ، مادەنيەتتىڭ ورداسى بولۋى ءتيىس. بۇل تۇرعىدا ەل اعالارىنا، اقساقالدارعا ارتىلار جۇك اۋىر»، - دەدى جانسەيىت تۇيمەبايەۆ.

وبلىس باسشىسى سونداي- اق، مەرەكە قارساڭىندا ارداگەرلەرگە دەمالىس ايماقتارىنا جولداما سىيلادى. ولاردىڭ قاتارىندا تۇركىستان وبلىسىنىڭ اقساقالدار القاسىنىڭ ءتوراعاسى جارىلقاسىن ازىرەتبەرگەنوۆ، تۇركىستان قالاسىنىڭ اقساقالدار القاسىنىڭ مۇشەسى جۇمادىل كىشىبايەۆ، تۇركىستان قالاسىنىڭ قوعامدىق كەلىسىم كەڭەسىنىڭ مۇشەسى رۇستەم كاميلوۆ سىندى 20-عا جۋىق ارداگەر بار.

اۆتور: اينۇر اقبايەۆا