ەڭ قىمبات فوتوسۋرەتتەر قانشا تۇرادى؟

نۇر-سۇلتان. قازاقپارات - باعاسى قىمبات فوتوسۋرەتتەر كوبىنە تاڭدانىس تۋدىرىپ جاتادى. ولاردىڭ كەيبىرەۋىن ارنايى كورمەدە قاراماسا، جۇمىستىڭ ءنارىن سەزىنبەي قالۋىڭىز مۇمكىن دەيدى تاجىريبەلى فوتوگرافتار.

مۇنداي فوتوسۋرەتتەردىڭ باعاسىن شارىقتاتىپ تۇرۋىنا نە سەبەپ بولۋى مۇمكىن؟ ەندەشە نازارىڭىزعا ەڭ قىمبات 5 فوتوسۋرەت ۇسىنامىز.

1. «فانتوم» (2014) - $6,5 ميلليون

اۆستراليالىق فوتوگراف پيتەر ليك بۇعان دەيىنگى رەكوردتاردىڭ ءبارىن ارتتا قالدىردى. ونىڭ «فانتوم» اتتى فوتوسۋرەتىن بەلگىسىز ءبىر كوللەكتسيونەر (اتىن كورسەتۋدى قالاماعان) 6,5 ميلليون دوللارعا ساتىپ العان ەكەن.

«مەنىڭ فوتوسۋرەتتەرىمنىڭ ماقساتى - تابيعاتتىڭ تىلسىم كۇشىن قاعىپ الىپ، سۋرەتكە ءتۇسىرۋ»، - دەيدى ليك. «فانتوم» - «ەلەس» اتتى سۋرەتتىڭ اق-قارا نۇسقاسى. وندا اريزونا شتاتىنداعى انتيلوپا كانونىڭ ۇڭگىرى تۇسىرىلگەن. ال «ەلەستىڭ» سيمۆوليكالىق كەيپى - كۇن ساۋلەسىندە اينالىپ جاتقان شاڭ.

2. «رەين 2» (1999) - $4,3 ميلليون

نەمىس فوتوگرافى اندرەاس گۋرسكي ءوزىنىڭ كەڭفورماتتى سۋرەتتەرىمەن تانىمال. 1999-جىلى ول رەين وزەنىن التى رەت تۇسىرەدى. سونىڭ ىشىندە سۋرەتى ەڭ كولەمدىسى ءارى تانىمالى «رەين II» سۋرەتى ەدى. «بۇل مەن ءۇشىن ءومىر ءمانىنىڭ اللەگوريالىق كەلبەتى»، - دەپ تۇسىندىرەدى اۆتور.

ول جازىق لاندشافت اسەرىن بەرۋ ءۇشىن سۋرەتتەگى زاۋىتتى، جاياۋ جۇرگىنشىلەردى، ۆەلوسيپەدشىلەردى الىپ تاستاعان ەكەن. ناتيجەسىندە سۋرەتتىڭ ەنى مەن ۇزىندىعى 1,9x3,6 مەتر بولعان.

فوتوسۋرەت 2011-جىلى «كريستيس» اۋكتسيونىندا 4,3 ميلليون دوللارا ساتىلعان. سۋرەت يەسىنىڭ اتى سول كۇيى بەلگىسىز كۇيىندە قالدى.

3. «ءولى سولداتتار اڭگىمەسى» (1992) - $3,6 ميلليون

سۋرەت تاقىرىبى كەڭەس اسكەرىنىڭ اۋعانستانداعى قىرعىنىنا ارنالعان. الايدا فوتوگراف دجەفف ۋولل سوعىستا بولماعان. ول سۋرەتتى ستۋديادا ارنايى دەكوراتسيادا ناتۋالارمەن تۇسىرگەن.

«ءولى سولداتتار اڭگىمەسى - اۋعان سوعىسىنا دەگەن كوزقاراس ەمەس، مەن تەك ءولى سولداتتاردىڭ ءبىر-بىرىمەن اڭگىمەلەسىپ جاتقان وبرازىن تۇسىرگىم كەلدى»، - دەيدى اۆتور.

سۋرەتتىڭ دەكوراتسيادا اكتەرلەرمەن تۇسىرىلگەنىنە قاراماستان «ءولى سولداتتار اڭگىمەسى» 2012-جىلى «كريستيس» اۋكتسيونىندا 3,6 ميلليون ا ق ش دوللارىنا ساتىلىپ كەتكەن.

4. «99 سەنت. ديپتيح» (2001) - $3,3 ميلليون

اندرەاس گۋرسكيدىڭ تاعى ءبىر سۋرەتى، ناقتىراق ايتقاندا ەكى سۋرەتى (ديپتيح اتالۋى سوندىقتان)، ەڭ قىمبات فوتوسۋرەتتەر رەيتينگىنە ەنىپ وتىر. ونىڭ ەكى سۋرەتى تاۋاردىڭ ءبارى 99 تسەنت تۇراتىن دۇكەندە تۇسىرىلگەن.

اۆتور ايتۋىنشا، ۇزىن-سونار قاتارلار قازىرگى تۇتىنۋشىلاردىڭ شەكسىز قاجەتىن كورسەتەدى ەكەن. 2,07x3,37 مەتر بولاتىن فوتوسۋرەت 2007-جىلى 3,3 ميلليون ا ق ش دوللارىنا ساتىلعان.

5. «اي ساۋلەسىندەگى كول» (1904) - $2,9 ميلليون

ەسكى سۋرەتتەردىڭ قىمبات بولۋى - زاڭدىلىق. ال ءتۇرلى-ءتۇستى ەتىپ تۇسىرىلگەندەرى اسا قىمبات سانالادى. مىسالى 1904-جىلى كول، ورمان، اي ساۋلەسىن ءتۇسىرىپ العان ەدۆارد ستايحەننىڭ فوتوسۋرەتى 2006-جىلى [ سوتبيس ] اۋكسيونىندا 2,9 ميلليون ا ق ش دوللارىنا ساتىلدى.

Massaget.kz