تۇركيانىڭ «دۇنيا» گازەتى تۇرىك جانە اعىلشىن تىلىندە «قازاقستان» جۋرنالىن شىعاردى

استانا. قازاقپارات - تۇركيانىڭ بەلدى ساياسي-ەكونوميكالىق باسىلىمدارىنىڭ ءبىرى «دۇنيا» گازەتى تۇرىك جانە اعىلشىن تىلىندە قوسىمشا «قازاقستان» جۋرنالىن شىعاردى.

جۋرنال قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ تۇركياعا رەسمي ساپارىنىڭ قورىتىندىسىنا جانە قازاقستاننىڭ جەتىستىكتەرى مەن استانانىڭ 20 جىلدىعىنا تارتۋ رەتىندە ۇسىنىلىپ وتىر، دەپ حابارلايدى قازاقپارات.

باسىلىمدا قازاقستان پرەزيدەنتىنىڭ تۇركياعا رەسمي ساپارى جانە انكارادا وتكەن قازاقستان- تۇركيا ينۆەستيتسيالىق فورۋمى تۋرالى كەڭىنەن اقپارات قامتىلعان. بۇدان بولەك، جۋرنالعا تۇركيا رەسپۋبليكاسىنىڭ 11-پرەزيدەنتى ابدوللا گۇلدىڭ «استانا ن. نازاربايەۆتىڭ ستراتەگيالىق كوزقاراسى ارقىلى باس قالا بولىپ قالىپتاستى»، تۇركيانىڭ سىرتقى ىستەر ءمينيسترى ميەۆليۋت چاۆۋشوعلۋدىڭ «تۇرىك كاسىپكەرلەرى سالعان عيماراتتار قازاقستاندى گۇلدەندىرىپ وتىر»، قازاقستاننىڭ ينۆەستيتسيا جانە دامۋ ءمينيسترى جەڭىس قاسىمبەكتىڭ «ترانس-كاسپي باعىتى ارقىلى ەكى ەل اراسىنداعى ساۋدا دامي تۇسەدى»، قازاقستاننىڭ تۇركياداعى ەلشىسى ابزال ساپاربەك ۇلىنىڭ «ورتالىق ازياعا ارنالعان شەتەلدىك ينۆەستيتسيالاردىڭ باسىم بولىگى قازاقستانعا سالىندى» اتتى ماقالالارى ەنگەن.

100 مىڭ تيراجبەن قازاقستاننىڭ تۇركياداعى ەلشىلىگىنىڭ قولداۋىمەن باسىلعان جۋرنالدا «قازاقينۆەست» ۇلتتىق كومپانياسىنىڭ باسقارما ءتوراعاسى س. تۇياقبايەۆتىڭ، استانا قالاسىنىڭ بۇرىنعى اكىمى ءا. يسەكەشيۆتىڭ، تۇركىستان وبلىسىنىڭ اكىمى ج. تۇيمەبايەۆتىڭ، الماتى وبلىسىنىڭ اكىمى ا. باتالوۆتىڭ، سولتۇستىك قازاقستان وبلىسىنىڭ اكىمى ق. اقساقالوۆتىڭ، اقتوبە وبلىسىنىڭ اكىمى ب. ساپاربايەۆتىڭ، پاۆلودار وبلىسىنىڭ اكىمى ب. باقاۋوۆتىڭ، باتىس قازاقستان وبلىسىنىڭ اكىمى ا. كولگىنوۆتىڭ، قاراعاندى وبلىسىنىڭ اكىمى ە. قوشانوۆتىڭ، شىمكەنت قالاسىنىڭ اكىمى ع. ءابدىراحىموۆتىڭ، ماڭعىستاۋ وبلىسىنىڭ اكىمى ە. توعجانوۆتىڭ قازاقستاننىڭ وڭىرلىك ەكونوميكالىق الەۋەتى مەن ينۆەستيتسيالىق مۇمكىندىكتەرى تۋرالى كولەمدى ماقالالارى جارىق كوردى.

سونداي-اق، باسىلىمدا شىعىس قازاقستان وبلىسى، جامبىل وبلىسى، قوستاناي وبلىسى مەن اقمولا وبلىسىنىڭ شەتەلدىك ينۆەستيتسيا تارتۋ مۇمكىندىكتەرى تۋرالى اقپاراتتار مەن اتالعان وڭىرلەردىڭ قازىرگى تاڭداعى دامۋ كورسەتكىشتەرى جاريالاندى. «بايتەرەك» حولدينگىنىڭ باسقارما ءتوراعاسى ا. ءارىپحانوۆتىڭ، «تاۋ-كەن سامۇرىق» ۇلتتىق كومپانياسىنىڭ باسقارما ءتوراعاسى ق. قۇدايبەرگەننىڭ، «دامۋ» قورىنىڭ باسقارما ءتوراعاسى ا. سارقۇلوۆتىڭ، «قازگەولوگيا» زەرتتەۋ كومپانياسىنىڭ باسقارما ءتوراعاسى ع. نۇرجانوۆتىڭ ماقالالارى مەن قازاقستاننىڭ ساۋدا-ەكونوميكالىق دامۋىنا ۇلەس قوسقان تۇرىك كاسىپكەرلەرىنىڭ قىزىقتى ەستەلىكتەرى مەن تولعانىستارى دا وسى باسىلىمنان جارىق كورىپ وتىر.

ەسكە سالا كەتەيىك، «دۇنيا» گازەتى 1952-جىلدىڭ 1- ناۋرىزىنان باستاپ ىستانبۇل قالاسىندا شىعادى. باسىلىمنىڭ العاشقى رەداكتورى بەلگىلى جۋرناليست فاتيح رىفكى اتاي بولاتىن. قازىرگى تاڭدا «دۇنيا» گازەتى «دۇنيا» كومپانيالار توبى تاراپىنان شىعارىلادى.