تورعايداعى شاقشاق جانىبەك مۋزەيى باسقا جاققا كوشىرىلۋى مۇمكىن

قوستاناي. قازاقپارات - شاقشاق جانىبەك مۋزەيى تورعايدان قوستانايعا كوشىرىلۋى مۇمكىن.

وبلىس اكىمدىگىندە وتكەن اپپارات ماجىلىسىندە وسى تاقىرىپ تالقىعا ءتۇستى، دەپ حابارلايدى قازاقپارات.

قازاقساننىڭ ۇزاق مەرزىمدى مادەني ساياساتىنىڭ تۇجىرىمداماسىندا قازىرگى زامانعى مادەني كلاستەرلەردى دامىتۋ ماقساتى جازىلعان. اتى اتالعان تۇجىرىمدامانى ىسكە اسىرۋ اياسىندا ءا. جانگەلدين مۋزەيلەر كەشەنىن جوندەۋ كوزدەلگەن. قازىرگى ۋاقىتتا اۋداندا ءتورت دەربەس مۋزەي بار. وبلىستىق مادەنيەت باسقارماسىنىڭ باسشىسى ەرلان قالماقوۆتىڭ سوزىنشە، بيىل ا. بايتۇرسىنوۆ جانە م. دۋلاتوۆ مۋزەيىندە جىلۋ جۇيەسى قالپىنا كەلتىرىلدى.

«2015-جىلدان باستاپ مەملەكەتتىك الەۋمەتتىك تاپسىرىس بويىنشا وبلىس اۋماعىنداعى ارحەولوگيالىق ەسكەرتكىشتەردى زەردەلەۋ جۇمىستارى جۇرگىزىلىپ جاتىر. ەكى جىل ىشىندە 418 ارحەولوگيالىق نىسان زەرتتەلىپ، جۇيەلەندى. تىزىمدەگى 122 ەسكەرتكىش ءا. جانگەلدين اۋدانىندا ورنالاسقان. بۇگىندە تورعايداعى شاقشاق جانىبەك مۋزەيى مەن ارقالىق قالاسىندا دالا ولكەسى تاريحى مۋزەيىنە كۇردەلى جوندەۋ جۇرگىزۋ ءۇشىن جوبالىق سمەتالىق قۇجاتتامالار ازىرلەنگەن. وسى نىساندار بويىنشا وتىنىمدەر بيۋدجەتتىك كوميسسيانىڭ قاراۋىندا جاتىر»، - دەدى ەرلان قالماقوۆ.

وبلىس اكىمى ارحيمەد مۇحامبەتوۆتىڭ ايتۋىنشا، اۋىل اقساقالدارى تورعايداعى شاقشاق جانىبەك مۋزەيىن وبلىس ورتالىعىنا كوشىرۋ تۋرالى باستاما كوتەردى.

«راسىن ايتۋ كەرەك، مۋزەي كوشىرۋ وڭاي جۇمىس ەمەس. ول قانشالىقتى ءتيىمدى، سونى ەسكەرگەن ءجون. مادەنيەت باسقارماسى باسشىلىعىنا ءبىر ايدىڭ ىشىندە وسى جونىندە ۇسىنىس ەنگىزۋگە تاپسىرما بەرەمىن. جادىگەرلەردى قوستاناي قالاسىنا ما، بالكىم زاتوبول كەنتى نەمەسە ماڭايداعى اۋداندارعا كوشىرۋ كەرەك پە، وسىنى قاراپ شىعىڭىزدار. الدىمەن مۇراجاي جاساقتايتىن بوس عيمارات ىزدەۋ كەرەك. قازىرگى شاقشاق جانىبەك ەسكەرتكىشى ماڭىندا بولسا، وتەتىن شارالارعا ءتيىمدى. بۇل ناۋقانعا جۇمسالاتىن شىعىن ەسەپتەلسىن. كەيىن مۋزەيدى كوشىرۋ-كوشىرمەۋ تۋرالى شەشىم شىعادى»، - دەدى ا. مۇحامبەتوۆ.

بۇگىنگى تاڭدا قوستاناي وبلىسىنىڭ اۋماعىندا 725 تاريح جانە مادەني ەسكەرتكىش بار، ونىڭ 5 ءى رەسپۋبليكالىق (ى. التىنسارين ەسكەرتكىشى، ەكىدىڭ I جانە ەكىدىڭ II عۇرىپتىق قۇرىلىستارى) جانە 720 سى جەرگىلىكتى ماڭىزعا يە.

قازىرگى ۋاقىتتا جاڭادان انىقتالعان ارحەولوگيالىق ەسكەرتكىشتەردى جەرگىلىكتى ماڭىزى بار تاريح جانە مادەنيەت ەسكەرتكىشتەرىنىڭ مەملەكەتتىك تىزىمىنە ەنگىزۋ جۇمىستارى جۇرگىزىلۋدە.