قازاقستاندىق «ءتۇن قۇدايى» فيلمى پاريجدە كورسەتىلدى

None
None
استانا. قازاقپارات - پاريجدە وتكەن فرانسۋزدىڭ «L'Etrange Festival»  كينوفەستيۆالى اياسىندا رەجيسسەر ءادىلحان ەرجانوۆتىڭ فيلموگرافياسى كورسەتىلدى، دەپ حابارلايدى قازاقپارات ءتىلشىسى «قازاقفيلم» كينوستۋدياسىنىڭ باسپا ءسوز قىزمەتىنە سىلتەمە جاساپ.

تۋىندىلار اراسىندا ق ر مادەنيەت جانە سپورت مينيسترلىگىنىڭ تاپسىرىسى بويىنشا ش. ايمانوۆ اتىنداعى «قازاقفيلم» كينوستۋدياسىندا تۇسىرىلگەن «ريەلتور»، «ۇكىلى كامشات» جانە «ءتۇن قۇدايى» فيلمدەرى دە بار.

رەجيسسەر ءادىلحان ەرجانوۆتىڭ ايتۋىنشا، ونىڭ فيلمدەرىنە فرانسۋز كورەرمەنى اسا قىزىعۋشىلىق تانىتقان. كەلۋشىلەر سانى كوپ بولىپ، كەزەككە تۇرىپ كۇتكەندەر دە بولعان. سونىمەن قاتار، رەجيسسەر ءتۇرلى كاسىبي كەزدەسۋلەر مەن سۇحباتتار وتكىزگەن.

«فرانسۋزدار ونەر مەن كينونى برازيليالىقتار فۋتبولدى تۇسىنگەندەي ۇعىنادى. ولار ءۇشىن ونەر - ۇلتتىق ءداستۇر. سوندىقتان دا كينوداعى اۆانگارد سول جاقتان تارايدى. كينوداعى مودانى كانن مەن فرانسيا جاسايدى. ول جاقتىڭ كورەرمەنىمەن سويلەسۋدىڭ ءوزى عانيبەت. ولار سينەفيلدەر - قازاق كينوسىندا بولىپ جاتقان دۇنيەلەردەن حاباردار. ولارعا شىنىمەن دە مەنىڭ كينوم قىزىقتى»، - دەدى ەرجانوۆ.

«L'Etrange Festival» شيرەك عاسىرعا جۋىق ۋاقىت وتكىزىلىپ كەلەدى. بۇل فەستيۆال «ەرەكشە، قايتالانبايتىن، سيرەك، جوعارى دەڭگەيدەگى» فيلمدەرگە ارنالعان. فەستيۆال باعدارلاماسىندا نەگىزگى بايقاۋ (لارس فون تريەردىڭ «دجەك تۇرعىزعان ءۇي» فيلمى كورسەتىلەتىن) مەن قىسقامەتراجدى فيلمدەردىڭ بايقاۋىنان بولەك، كونكۋرستان تىس باعدارلامادا جاپون جاڭا تولقىنىنىڭ فيلمدەرىنىڭ كورسەتىلىمى، اڭىزعا اينالعان Nikkatsu اتتى جاپون ستۋدياسىنىڭ فيلمدەرىنىڭ رەتروسپەكتيۆاسى، سونداي- اق «جاڭا تالانتتار»، «دەرەكتى كينو» سەكسيالارى بار.

اۆتور: ايان بەكەن ۇلى

Қазақстандық «Түн құдайы» фильмі Парижде көрсетілді

Қазақстандық «Түн құдайы» фильмі Парижде көрсетілді

سوڭعى جاڭالىقتار