جانىبەك ءالىمحان ۇلىنىڭ قارسىلاسى - كولۋمبيالىق «جاۋىنگەر» تۋرالى نە بىلەمىز
27 جاستاعى كارلوس گالۆاننىڭ كاسىپقوي بوكستا جۇرگەنىنە تۋرا 7 جىل بولدى. كاسىپقوي رينگتەگى دەبيۋتى 2011 -جىلى 30 - قىركۇيەكتە بولدى. العاشقى التى كەزدەسۋىن ءساتتى وتكىزىپ، قارسىلاستارىنان باسىم تۇسكەن. لاقاپ اتى - «El Guerrero» (ماعىناسى - جاۋىنگەر). الايدا بەتى قايتپاعان بوكسشى جەتىنشى كەزدەسۋىندە ءوز وتانداسى سەگۋندا حەررەرومەن تەڭ ءتۇسىپ، سەگىزىنشى ايقاستا رەسەيلىك ولەگ ليسەيەۆتەن ۇتىلىپ قالدى. وسىلايشا، بارلىعى 24 جەكپە- جەكتىڭ 16-سىندا جەڭىسكە جەتىپ (15- ءى نوكاۋت)، 7-دە جەڭىلدى، 1 رەت تەڭ ءتۇستى.
ايتا كەتەرلىگى، كارلوس گالۆان سوڭعى جەكپە- جەگىن وسى جىلدىڭ ناۋرىزىندا وتكىزىپ، قازاقستاندىق بوكسشى گەننادي گولوۆكيننىڭ بۇرىنعى قارسىلاسى ۆيللي مونرومەن ايقاسقان. كولۋمبيالىقتىڭ جەتىنشى جەڭىلىسى وسى مونروعا بايلانىستى. ەسكە سالا كەتسەك، 2015 -جىلدىڭ مامىرىندا گەننادي گولوۆكين كاليفورنيا شتاتى ينگلۆۋد قالاسىنداعى «فورۋم» ارەناسىندا امەريكالىق كىشى ۆيللي مونرونى التىنشى راۋندتا نوكاۋتقا جىبەرىپ، ورتا سالماقتا سۋپەرچەمپيوندىق اتاعىن قورعاپ قالعان بولاتىن.
كارلوس گالۆاننىڭ ينستاگرام پاراقشاسىندا ايقاسقا قانات يسلامنىڭ باپكەرى كىشى نەلسون دجۋنيورمەن دايىندالىپ جاتقانىن كورۋگە بولادى.
ەسكە سالا كەتسەك، جانىبەك ءالىمحان ۇلى (2-0-0,1 ك و) كاسىپقوي بوكستا ەكى جەكپە- جەك وتكىزگەن. ەكەۋىن دە جەڭىسپەن اياقتادى، ونىڭ بىرىندە نوكاۋت بولسا، ەكىنشىسى تورەشىلەردىڭ شەشىمىمەن بەرىلدى. قازاقستاندىق بوكسشىنىڭ امەريكاداعى العاشقى جەكپە- جەگىندە كولۋمبيالىقپەن جۇدىرىقتاساتىنىن جازعان بولاتىنبىز.
بوكسشىنىڭ فەيسبكۋكتەگى رەسمي پاراقشاسىندا حابارلانعانداي، وتانداسىمىز كاسىپقوي رينگتەگى ءۇشىنشى كەزدەسۋىن 28 - قىركۇيەك كۇنى كاليفورنيا شتاتى وكلەند قالاسىندا وتكىزەدى.
اۆتور: ايان بەكەن ۇلى