تۇركىستان وبلىسىندا «وتىرار جادىگەرلەرى» اتتى كىتاپ جارىق كوردى

تۇركىستان. قازاقپارات - تۇركىستان وبلىسىنىڭ وتىرار اۋدانىندا «وتىرار جادىگەرلەرى» كىتابى جارىق كوردى. اۋداندىق اكىمىشىلىكتىڭ دەمەۋشىلىگىمەن جارىق كورگەن تۋىندىنىڭ اۆتورلارى مەملەكەت جانە قوعام قايراتكەرى قۋانىش ايتاحانوۆ پەن ەتنوگراف، ولكەتانۋشى ابدۋللا جۇماشيەۆ، دەپ حابارلايدى قازاقپارات ءتىلشىسى.

 ەلباسىمىز ن. ءا. نازاربايەۆتىڭ «رۋحاني جاڭعىرۋ» باعدارلاماسىنىڭ اياسىندا جارىق كورگەن تۋىندا تۋعان جەردىڭ قاسيەتتى جەرلەرى مەن جادىگەرلەرىن ناسيحاتتاۋ ماقساتىندا شىعىپ وتىر. البوم- كىتاپ وتىرار وركەنيەتى قالىپتاستىرعان زاتتىق- تۇرمىستىق جانە رۋحاني مادەنيەتتەن سىر شەرتەدى. وندا ءابۋ ءناسىر ءال- فارابي جانە ونىڭ ارعى- بەرگى ءىزباسارلارىنىڭ قولجازبالارى مەن تاسباسپا مۇرالارى، ولاردىڭ ءوزى جانە وتباسى تۇتىنعان مۇلىكتەر مەن باسقا دا ارحەولوگيالىق- ەتنوگرافيالىق قولونەر بۇيىمدارى جايلى جازىلعان.

سونداي- اق، شارۋاشىلىق قۇرال- سايماندارى، وتىراردىڭ قۇپيا كومبەلەرى، 1930 -جىلعا دەيىن ارىستانباب كەسەنە- مەشىتى جانىندا رۋحاني اعارتۋ وشاعى بولعان شاعىن مۇسىلمان كىتاپحاناسى تۋرالى دا ءسوز بولادى. كىتاپتاعى يلليۋستراتسيالىق ماتەريالدار نەگىزىنەن وتىرار مەملەكەتتىك ارحەولوگيالىق قورىق- مۋزەيى مەن «رۋحانيات - ابۋ ءناسىر ءال- فارابي مۋزەيى» مەملەكەتتىك كوممۋنالدىق قازىنالىق كاسىپورىننىڭ قورىندا، سونداي- اق، جەكە كىسىلەردىڭ قولىندا ساقتالعان قولونەر بۇيىمدارىنىڭ ءتۇپنۇسقاسىنان، فوتوسۋرەتتەردەن ءتۇسىرىلىپ پايدالانىلعان. تىڭ تۋىندى ەجەلگى زاتتىق جانە رۋحاني مۇرانى قاستەرلەيتىن كوپشىلىككە ارنالىپ وتىر.

اۆتور: اينۇر اقبايەۆا