جاپون عالىمدارى عارىش ليفتىسىن جاساپ شىعاردى

توكيو. قازاقپارات - جاپونيا   Kounotori 7 پيلوتسىز عارىش كەمەسى جالعانعان H-2B اۋىر زىمىرانىن ويداعىداي ۇشىردى. ول حالىقارالىق عارىش ستانساسىنا جۇك پەن ەكسپەريمەنتتىك قۇرىلعىنى جەتكىزەتىن بولادى، دەپ حابارلايدى ت ا س س اگەنتتىگى.

Kounotori 7 ستانساعا ەكى Stars-me  شاعىن سپۋتنيگىن جەتكىزۋى ءتيىس. ولاردى وڭدەۋمەن اينالىسقان سيدزۋوكا ۋنيۆەرسيتەتىنىڭ سايتىندا حابارلانعانداي، قىرى 10 س م بولاتىن تەكشە ءپىشىندى اپپاراتتار ءوزارا ۇستىنەن موتورى مەن كامەراسى بار كىشىگىرىم كاپسۋلا قوزعالىپ وتەتىن 10 مەترلىك بولاتتان جاسالعان ارقانمەن جالعانعان. بۇل قۇرىلعىنىڭ بارلىعى عارىش ليفتىسى ۇلگىسىنىڭ جۇمىسى تانىستىرىلاتىن اشىق كەڭىستىككە ۇشىرىلماق.

ايتا كەتۋ كەرەك، ءدال وسىنداي كەمە 2016 -جىلعى جەلتوقساندا دا ۇشىرىلعان ەدى. ونداعى ماقساتتىڭ ءبىرى - عارىشتاعى قوقىستى جيناۋ بولدى، الايدا ەكسپەريمەنت ءساتسىز اياقتالعان بولاتىن.