موڭعوليادا تۇراتىن قانداسىمىز ايشولپاندى حالىقارالىق جارىستاردا قارجىلاي قولداۋعا دايىنبىز - مينيستر

 استانا. قازاقپارات - كەشە ق ر مادەنيەت جانە سپورت ءمينيسترى ارىستانبەك مۇحامەدي ۇلى موڭعوليادا تۇراتىن بۇركىتشى قىز ايشولپان نۇرعايىپ قىزىمەن كەزدەستى، دەپ حابارلايدى قازاقپارات ءتىلشىسى.

«وزدەرىڭىز بىلەسىزدەر، ەلباسىمىزدىڭ «رۋحاني جاڭعىرۋ» باعدارلاماسى وسىدان ءبىر جىل بۇرىن جاريا ەتىلگەندە بارشا قازاقستان حالقى قۋانعان بولاتىن. ويتكەنى، وسى ۋاقىتقا دەيىن ساقتالعان اتا- ءداستۇرىمىزدى، قاسيەتتەرىمىزدى ناسيحاتتاۋعا، قازىرگى جەتكەن جەتىستىكتەرىمىزدى دۇنيەجۇزىنە پاش ەتۋگە مۇمكىندىك بەردى. وسى رەتتە كونەدەن كەلە جاتقان ساياتشىلىق ونەرىمىزدى بۇكىل الەمگە تانىتىپ، بارلىعىن تاڭ قالدىرىپ جۇرگەن ايشولپانعا العىسىمىزدى بىلدىرەمىز»، - دەدى مينيستر.

سونىمەن قاتار ارىستانبەك مۇحامەدي ۇلى ەلىمىزدە ۇلتتىق سپورتتى دامىتۋ باعىتىندا جۇرگىزىلىپ جاتقان جۇمىستارعا توقتالدى.

«وسىدان ەكى جىل بۇرىن ۇلتتىق سپورت تۇرلەرىن دامىتۋ ورتالىعىن اشتىق. وتكەن جىلى ەكسپو اياسىندا كوكپاردان دۇنيەجۇزىلىك چەمپيونات ءوتىپ، وعان امەريكادان، ۆەنگريادان، جالپى كوپتەگەن ەلدەردەن كوكپارشىلار قاتىسىپ، بارىنشا قىزىقتى بولدى. ءبىز ەلىمىزدىڭ ۇلتتىق سپورت تۇرلەرىن دامىتۋ ءۇشىن كوپتەگەن شارا وتكىزىپ تۇرامىز. سوعان قاتىسقانىڭدى قالايمىز. وبلىستارعا شىعۋعا دا كومەك بەرەمىز. حالىقارالىق جارىستارعا قاتىسامىن دەسەڭ، جول قاراجاتى سىندى شىعىندارىڭدى وتەۋگە دايىنبىز»، - دەدى مينيستر ايشولپانعا قاراتا.

ۇلتتىق جانە ات سپورتى تۇرلەرى ورتالىعىنىڭ ديرەكتورى نۇرسۇلتان يبراگيموۆ ايشولپاننىڭ ءبىر اڭشىلىق ماۋسىمدا 14 تۇلكى مەن 2 قاسقىر العانىن اتاپ ءوتتى.

«بۇل ۇلكەن جەتىستىك. وسىنداي تاجىريبەنى ءبىزدىڭ اعا جاتتىقتىرۋشىلارىمىزعا، جالپى قۇسبەگىلىكتى سەرىك ەتكەن سپورتشىلارعا ۇلگى رەتىندە ۇيرەتىپ، شەبەرلىك ساباقتارىن وتكىزسە دەگەن ۇسىنىسىمىز بار. قۋانا قارسى الامىز. قاراشا ايىندا بۇركىتشىلەردىڭ حالىقارالىق جارىسى قازاقستان جەرىندە وتەدى. وعان موڭعوليا جەرىنەن 10 نان استام بۇركىتشى قاتىسادى دەگەن جوسپار بار»، - دەدى ول.

ال ايشولپان پەن اناسى الماگۇل كوكسەگەن ارنايى قابىلداپ، قوناقجايلىق تانىتقان مينيستر ارىستانبەك مۇحامەدي ۇلىنا ريزاشىلىعىن ءبىلدىردى.

كەزدەسۋگە قاتىسقان «ءبىلىم- يننوۆاتسيا» حالىقارالىق قوعامدىق قورىنىڭ پرەزيدەنتى دارحان ەرماحان ۇلىنىڭ ايتۋىنشا، ايشولپان بۇگىنگە دەيىن الەمنىڭ 30-دان استام ەلىن ارالاپ، ا ق ش- تا 8 مارتە بولعان ەكەن. دەگەنمەن، ول سۇحباتتارىنىڭ بىرىندە اتا جۇرتى قازاقستانعا بارۋدى ارمانداعاندىعىن ايتقان.

«ءبىز سول ارمانىن ورىنداۋ ماقساتىندا قازاقستانعا الىپ كەلدىك. مۇنان بولەك، ايشولپان گارۆارد، وكسفورد ۋنيۆەرسيتەتتەرىنەن شاقىرتۋ العان بولاتىن. سول ءۇشىن Spectrum حالىقارالىق مەكتەبىندە وقىتىپ، تىلدىك دەڭگەيىن، اكادەميالىق ءبىلىمىن جەتىلدىرمەك ويىمىزدا بار. ول ءۇشىن ارنايى باعدارلاما ازىرلەيمىز. ۇسىنىسىمىزدى اتا- انالارى قاراستىرىپ جاتىر»، - دەدى دارحان ەرماحان ۇلى.

جۇزدەسۋ سوڭىندا ارىستانبەك مۇحامەدي ۇلى ايشولپانعا Ipad، ال اناسىنا كامزول سىيعا تارتتى. ايشولپان دا مينيسترگە تاسقا قاشالىپ سالىنعان سۋرەت سىيلادى.

اۆتور: مارلان جيەمباي