قوستاناي وبلىسىنىڭ اۋداندارى استىقتى ەكسپورتقا شىعارۋعا دايىن

قوستاناي. قازاقپارات - بۇگىن قوستاناي وبلىسىنىڭ اكىمى ارحيمەد مۇحامبەتوۆ سارىكول، قاراسۋ اۋداندارىنا جۇمىس ساپارىمەن باردى، دەپ حابارلايدى قازاقپارات.

ءوڭىر باسشىسى الدىمەن سارىكول اۋدانىنىڭ اگروونەركاسىپىك كەشەنىمەن تانىستى. 22 - قىركۇيەككە دەيىنگى مالىمەت بويىنشا، اۋداندا 284,7 مىڭ گەكتار ءداندى داقىل، 35,5 مىڭ گەكتار مايلى داقىل ەگىلگەن. القاپتاردا 464 كومباين جۇمىس ىستەدى. ماسەلەن، ساپالى تەحنيكالاردىڭ ارقاسىندا «مەليتوپولسكوە» ج ش س ديقاندارى گەكتارىنا 18,7 سەنتنەر ءونىم الدى.

«مەليتوپولسكوە» سەرىكتەستىگى بيىل قۇنى 185 ميلليون تەڭگەلىك بيداي تازالاعىش كەشەنى قۇرىلىسىن سالدى. ەندى ولار استىقتى ەكسپورتقا شىعارۋعا قاۋقارلى. الايدا، وبلىس اكىمى بيداي ساتۋعا اسىقپاۋ كەرەكتىگىن ايتتى.

«نارىققا شىعارماستان بۇرىن استىقتىڭ ساپاسىنا ءمان بەرىڭىزدەر. ەش اسىعۋدىڭ رەتى جوق. الدىمەن، قۇرعاتىپ الىڭىزدار. بۇگىندە كورشىلەس رەسەي بىلتىرعىداي مول استىق جيناعان جوق. سوندىقتان كورشى ەلدەردىڭ ىشكى سۇرانىسى مول بولۋى مۇمكىن. قازىر ارزانعا وتكىزگەنشە، كوكتەمگە قاراي ساتىڭىزدار»، - دەدى وبلىس اكىمى سەرىكتەستىك باسشىسىنا.

وسىدان ەكى جىل بۇرىن سارىكول اۋدانىندا قۇنى 600 ميلليون تەڭگەگە باعالانعان ءىرى استىق ساقتاۋ قويماسى سالىنعان بولاتىن. قويما سىيىمدىلىعى 24 مىڭ تونناعا لايىقتالعان. ينۆەستيتسيالىق جوبانى «اقپان- ينۆەست» ج ش س قارجىلاندىردى. وسى كەزەڭدە مۇندا 32 ادام جۇمىس ىستەيدى. اتالعان ج ش س ديرەكتورى دانيار وتەۋليننىڭ سوزىنشە، استىق جيناۋ جوسپار جۇمىستارى بويىنشا ورىندالىپ كەلەدى.

ارحيمەد مۇحامبەتوۆ قازاقستانداعى ەڭ ءىرى استىق قويماسى - سارىكول ەليەۆاتورىندا بولدى. ەليەۆاتوردىڭ سىيىمدىلىعى 400 مىڭ توننادان استام. بۇل - شامامەن وبلىستاعى ەكى اۋداننىڭ استىعى. ەليەۆاتوردا ساقتاۋ، كەپتىرۋ، تيەۋ، وڭدەۋ سياقتى 5 قىزمەت ءتۇرى كورسەتىلەدى. ارحيمەد مۇحامبەتوۆ اۋىل شارۋاشىلىعى تاۋار وندىرۋشىلەردىڭ جۇمىسىنا جاقسى باعاسىن بەردى.

 «استىق كولەمى بويىنشا بىلتىرعى جىلدىڭ كورسەتكىشىنەن 10 پايىزعا قالىپ كەلەمىز. قازىر وبلىستا 4 ميلليون گەكتار ءداندى، 600 مىڭ گەكتار مايلى داقىلدار جينالدى. الداعى ۋاقىتتا بۇل كورسەتكىش ۇلعايادى. ەگىس ماۋسىمى اياعىنا دەيىن مايلى داقىلداردىڭ ۇلەسىن 700 مىڭ گەكتارعا دەيىن جەتكىزۋ جوسپاردا بار. بۇل ءبىزدىڭ وبلىس ءۇشىن جاقسى كورسەتكىش بولار ەدى»، - دەدى ارحيمەد مۇحامبەتوۆ.

وبلىس باسشىسى قاراسۋلىقتارعا استىقتى ارتىق شىعىن شىعارماي، ۋاقىتىندا جيناپ الۋدى تاپسىردى. اكىم ساپارى قاراسۋ اۋدانىندا جالعاسادى.

اۆتور: قاسقىرباي قويشىمانوۆ