استانالىقتار زاڭ ماسەلەسى بويىنشا تەگىن كەڭەس الدى

استانا. قازاقپارات - جاستار سارايىندا قالا تۇرعىندارى ءۇشىن زاڭ تۇرعىسىنان تەگىن كەڭەستەر بەرىلدى. بۇل رەسپۋبليكالىق اكتسيا استانا قالاسى اكىمدىگىنىڭ قولداۋىمەن «MEDIATOR KZ» كومپانياسى وتكىزدى، دەپ حابارلايدى اكىمدىكتىڭ باسپا ءسوز قىزمەتى.

ءىس- شارانىڭ باستى ماقساتى - حالىقتى قۇقىقتىق تۇرعىدا اعارتۋ.

 «وسىنداي شارالار حالىققا وتە كەرەك. باستىسى ادام ءوز قۇقىعىن ءبىلۋى ءتيىس. زاڭدى بىلمەگەن سوڭ ادامدار كوپ قاتەلىك جاسايدى، ءوز قۇقىعىن دا قورعاي المايدى، سول سەبەپتى وسىنداي شارالار وتە قاجەت. ادام قانداي دا ءبىر ءىستى نەمەسە تاعى باسقا دۇنيەنى جۇزەگە اسىرماس بۇرىن ماماندارمەن كەڭەسۋى كەرەك. مىسالى، زاڭدىلىق جاعىنان بولسا، مىندەتتى تۇردە زاڭگەرمەن»، - دەدى رەسپۋبليكالىق اكسيانى ۇيىمداستىرۋشى، «MEDIATOR KZ» كومپانياسىنىڭ زاڭگەرى قازبەك نۇرماعانبەتوۆ.

 ءتيىستى ماماندار ۇلەستىك قۇرىلىس، جەر ماسەلەسى، وتباسىلىق زاڭناما جانە ازاماتتىق قۇقىقتىڭ باسقا دا سالالارى بويىنشا ءار كەلۋشىنى جەكە- جەكە قابىلداپ كەڭەس بەردى. ءىس- شاراعا «MEDIATOR KZ»، «Bestavdocat»  كومپانيالارىنىڭ سونداي- اق، كوكشەتاۋ، تەمىرتاۋ جانە ەسىل اۋدانىنان ارنايى شاقىرىلعان زاڭگەرلەر قاتىستى.

«مۇنداي تاجىريبەلەر ءجيى وتكىزىلەدى. اكىمدىك ءارقاشان ءبىزدى قولداپ وتىرادى. بۇل جەردە ماقسات پايدا تابۋ ەمەس، تۇرعىندارعا ءوز قۇقىقتارىن ءبىلۋ بويىنشا كەڭەس بەرۋ، ەلدى زاڭ جاعىنان ساۋاتتى ەتۋ. كوبىنەسە ادامدار ءوز قۇقىقتارىن بىلمەي جاتادى، سول سەبەپتى دە وزدەرىن قورعاي المايدى»، - دەپ اتاپ ءوتتى «MEDIATOR KZ» كومپانياسىنىڭ زاڭگەرى ماقپال ورازعالييەۆا.

 زاڭگەرلەردىڭ ايتۋىنشا، ادامدار كوبىنەسە تۇرعىن ءۇي جانە وتباسىلىق ىستەر بويىنشا كەڭەس الادى. ەكونوميكالىق جاعداي بويىنشا وتىنىشتەر كوبىنەسە بورىشتىق جانە ەڭبەك ماسەلەلەرىنە تيەسىلى. سونداي- اق، مۇرانى قالدىرۋ نەمەسە مۇرانى الۋ بويىنشا كەڭەس الۋعا كەلەدى ەكەن.

 «بۇگىنگى قابىلداۋعا وتە رازىمىن، جىلى قارسى الدى، مەنىڭ بار سۇراعىما جاۋاپ بەردى. مەن وزىمشە، قاي سۇراقتى قالاي شەشەتىنىمدى ىشتەي شەشىپ الدىم. اقىل- كەڭەس زاڭ تۇرعىسىنان بولعان سياقتى ەدى، ءبىراق بىلاي قاراپ تۇرسام پسيحولوگيالىق تۇرعىدا دا بولىپتى. ءسىز بىلەسىز عوي، ءار كاسىبي مامان ءبىر جاعىنان - پسيحولوگ. مەن بۇل اكسيانى قۇپتايمىن، ءجيى بولىپ تۇرسا دا ارتىق ەتپەيدى»، - دەپ ءوز ويىمەن ءبولىستى شاراعا كەلۋشى.