سەمەيدە شىلىكتىدەن تابىلعان «التىن ادامنىڭ» كوشىرمەسى جاسالدى
كوشىرمەنى ازىرلەۋ ءۇشىن سۋرەتشى- رەستاۆراتور، ەلىمىزدىڭ ەڭبەك سىڭىرگەن قايراتكەرى ءارى اكادەميگى التىنبەك قىرىم جارتى جىل بويى قالپىنا كەلتىرۋمەن اينالىستى. قالاداعى ولكەتانۋ مۋزەيىندە بىرەگەي ەكسپوناتتىڭ تۇساۋكەسەرى ءوتتى. جانۋارلار مەن وسىمدىكتەر بەينەلەنگەن ساۋىت 4 مىڭ التىن جالاتىلعان بۇيىمنان جاسالعان. ەستەرىڭىزگە سالا كەتسەك، شىلىكتىدەگى «التىن ادام» 2004 -جىلى تابىلعان بولاتىن. ونىڭ جەرلەۋ مەرزىمى ءبىزدىڭ داۋىرىمىزگە دەيىنگى VII عاسىرعا جاتادى. دەمەك شىلىكتىدەن تابىلعان «التىن ادام» ەسىكتەگىدەن 400 جىلعا ۇلكەن.
«بۇل وتە ءبىز ءۇشىن تاريحي ماڭىزدى وقيعا دەپ ايتۋعا بولادى. ويتكەنى «التىن ادامنىڭ» تاريحىن سەمەيلىكتەرگە، قالا قوناقتارىنا، وسكەلەڭ ۇرپاققا تانىستىرۋ - مىندەتىمىز. ويتكەنى بۇل - قازاقتىڭ تاريحى. سوندىقتان قازاقتىڭ تاريحىن ءبىلۋ، ونى جاستارعا ۇيرەتۋ - ءبىزدىڭ پارىزىمىز»، - دەدى وبلىستىق تاريحي- ولكەتانۋ مۋزەيى ديرەكتورىنىڭ ورىنباسارى ءلاززات ءالجان.