تۇركى اكادەمياسى مەن «ەۋرازيا جازۋشىلار وداعى» استانادا مەموراندۋمعا قول قويدى
استانا. قازاقپارات - استانادا وتكەن «قازىرگى زامانعى ءسوز ەنەرگياسى» اتتى ەۋرازيالىق ادەبي فورۋمعا كەلگەن تۇركيالىق جازۋشى، «ەۋرازيا جازۋشىلار وداعىنىڭ» ءتوراعاسى ياكۋب ومەروعلۋ TWESCO- دا بولىپ، اكادەميا پرەزيدەنتى دارحان قىدىرالىمەن كەزدەستى، دەپ حابارلايدى قازاقپارات.
تۇركى اكادەمياسى حالىقارالىق ۇيىمىنان ءمالىم ەتكەندەي، ۇيىم پرەزيدەنتى دارحان قىدىرالى TWESCO- نىڭ اتقارعان جۇمىسى مەن قىزمەتىنىڭ نەگىزگى باعىتتارى تۋرالى ايتتى. ۇيىم باسشىسى تۇركى ينتەگراتسياسىن تەرەڭدەتۋدە عىلىمي- گۋمانيتارلىق باعىتتارمەن قاتار، ادەبي- مادەني بايلانىستاردىڭ دا ماڭىزدى ەكەندىگىنە توقتالدى. ءوز كەزەگىندە ياكۋب ومەروعلۋ تۇرىك قالامگەرلەرى مەن قازاق جازۋشىلارى اراسىنداعى رۋحاني قارىم- قاتىناستار تۋرالى كەڭىنەن اڭگىمەلەدى.
سونداي- اق كەزدەسۋ بارىسىندا TWESCO مەن «ەۋرازيا جازۋشىلار وداعى» اراسىندا ءوزارا ىنتىماقتاستىق تۋرالى مەموراندۋمعا قول قويىلدى. تاراپتار عىلىمي- ادەبي باسىلىمداردىڭ ورتاق بازاسىن قالىپتاستىرۋ، اۆتورلىق قۇقىقتى ساقتاۋ ماسەلەلەرىنىڭ وزەكتى ەكەندىگىن اتاپ ءوتتى. سونىمەن قاتار قوس ۇيىمنىڭ ءوزارا ىنتىماقتاستىقتا جۇمىس ىستەۋىنىڭ ارتىقشىلىقتارى، تۇركى دۇنيەسىندەگى عىلىمي- ادەبي باسىلىمداردىڭ بەدەلىن ارتتىرۋ تۋراسىندا پىكىر الماستى.