قازالىدا جۇزىممەن قاپتالعان كيىز ءۇي بار
اقتان باتىر اۋىلىنىڭ تۇرعىنى مالىك بالتابەك ۇلى باعباندىق پەن ۇستالىق كاسىپتى تەڭ مەڭگەرگەن. ونىڭ ءۇيىنىڭ اۋلاسىنا باس سۇققاننان بويىڭىز سەرگىپ، جانسارايىڭىز اشىلىپ سالا بەرەدى.
اۋلاسىندا جايقالا ءوسىپ تۇرعان قىزىل، كوك، قارا ءتۇستى ءجۇزىم، قارا ورىك، سارى ورىك، المۇرت، جەرگىلىكتى شاعىن الما، كوك اپورت، سارى اپورت، شابدالى، شيە، جيدەك اعاشتارى الىستان جانارىڭدى اربايدى.
ونى ايتاسىز، قازالىدا كوپ كەزدەسە بەرمەيتىن بىرنەشە ءتۇپ گرەك جاڭعاعىنىڭ اعاشى ءۇي يەسىنىڭ ناعىز مايتالمان باعبان ەكەنىن ايعاقتايدى. ايتپاقشى، اۋلادا قالىڭ وسكەن سىپسە دە (سىپىرعىش بۋىلادى) بار.
«ءجۇزىمنىڭ، المانىڭ كوپتەگەن سورتىن، المۇرت، شيە، ورىكتى ەگىپ، ءوسىرىپ وتىرمىن. مىناۋ التى قاناتتى كيىز ءۇي، ونى اينالدىرا ءجۇزىم ەككەنمىن. ءقازىر كومكەرىپ تۇر. كوكتەمدە ەرتە كوكتەپ، قاناتتى ءۇيدى قاپتايدى. كوركى كوز تارتادى. كەيبىرەۋلەر بۇل جاسىل- جەلەككە قىزىعىپ، كورۋ ءۇشىن الىس- جاقىننان كەلىپ جاتىر. نەگىزى، اكە- شەشەم وسىنىڭ ساياسىندا، كولەڭكەسىندە وتىرسىن دەگەن ماقساتپەن جاساعان بولاتىنمىن»، - دەيدى باعبان.
مالىكتىڭ باسقا دا قىرى جەتىپ- ارتىلادى. ول - ون ساۋساعىنان ونەر تامعان شەبەر. قازىرگى تاڭدا مالىك ماحامبەت بالالارىمەن بىرگە جەمىس- جيدەك، كوكونىس ەگىپ، ءونىمىن وتكىزىپ ريزىقتارىن تابۋدا. ءتۇرلى بۇيىمدار جاساپ، جالعا بەرۋدى كاسىپ كوزىنە اينالدىرعان. ەل اراسىندا مالىك قولدان جاساعان «گورەلكا»، اسەم جابدىقتالعان شاتىر (پالاتكا)، قازان- وشاق، تيتان، جەر ۇستەلدەر، كيىز ۇيلەرگە سۇرانىس جوعارى.