قازاقستاندا وڭدەلمەگەن ءىرى قارا مال تەرىسىن ەكسپورتتاۋعا شەكتەۋ قويىلادى

استانا. قازاقپارات - پرەمەر- ءمينيستردىڭ ورىنباسارى ەربولات دوسايەۆتىڭ توراعالىعىمەن بىلعارى كاسىپورىندارىن قولداۋعا ارنالعان ۆەدومستۆوارالىق كوميسسيانىڭ وتىرىسى ءوتتى، دەپ حابارلايدى قازاقپارات ق ر ينۆەستيتسيالار جانە دامۋ مينيسترلىگىنىڭ باسپا ءسوز قىزمەتىنە سىلتەمە جاساپ.

وتىرىستا قازاقستان رەسپۋبليكاسىنىڭ اۋماعىنان وڭدەلمەگەن ءىرى قارا مال تەرىلەرىنىڭ ەكسپورتىنا تىيىم سالۋدى ەنگىزۋدى قاراستىراتىن سىرتقى ساۋدا ساياساتى ماسەلەلەرى مەن حالىقارالىق ەكونوميكالىق ۇيىمدارعا قاتىسۋ جايى قارالدى.

بۇدان بۇرىن وتاندىق بىلعارى كاسىپورىندارىن شيكىزاتپەن قامتاماسىز ەتىپ، جۇكتەمەلەرىن كوبەيتۋ ماقساتىندا ينۆەستيتسيالار جانە دامۋ مينيسترلىگىنىڭ 2016 -جىلدىڭ قاراشاسىنان 2017 -جىلدىڭ ءساۋىر ايىنا دەيىن قازاقستان رەسپۋبليكاسىنان تىسقارى جەرگە وڭدەلمەگەن ءىرى قارا مال تەرىسىن شىعارماۋ جونىندەگى بۇيرىعى شىققان بولاتىن. بۇل ناقتى كاسىپورىنداردىڭ وڭ ناتيجەلەرىن كورسەتتى.

شەكتەۋ قويىلعان ۋاقىتتا بىلعارى كاسىپورىندارىنىڭ قىزمەتى قالپىنا كەلە باستادى. ءوندىرىس قۋاتى مەن اتالمىش سالانىڭ وتاندىق وندىرىستەگى تيىمدىلىگى ارتتى. قازاقستاندىق كاسىپورىندار ءىرى قارا مال تەرىسىن وڭدەگەندە مىناداي ونىمدەر شىعارادى: جارتىلاي بىلعارى فابريكاتى (wet blue، بويالعان بىلعارى قاباتى) جانە دايىن ءونىم (بىلعارى اياق كيىم، جيھاز، كيىم، گالانتەرەيا، ەر- تۇرمان).

ايتا كەتۋ كەرەك، سوڭعى جىلدارى دايىن بىلعارى ءوندىرىسىن ۇلعايتۋ ءۇردىسى بايقالدى. وسىلايشا 2015 -جىلمەن سالىستىرعاندا دايىن بىلعارى ءوندىرىسى 4,1 ەسەگە ۇلعايىپ، 2017 -جىلى 15,5 ميلليون شارشى ديتسيمەتردى قۇرادى.

مۇنداي وڭ ديناميكا ەكسپورتتا دا بايقالىپ وتىر. ياعني 2017 -جىلى يلەنگەن تەرى ەكسپورتىنىڭ كولەمى 2015 -جىلمەن سالىستىرعاندا 91 پايىزعا ارتىپ، 164,9 مىڭ توننادان ($ 506,7 مىڭ) 315,8 تونناعا ($ 803,3 مىڭ) دەيىن ءوستى. يلەنگەن تەرىلەردىڭ ورتاشا ەكسپورتتىق باعاسى جارتىلاي فابريكاتتار باعاسىنان 4 ەسە جوعارى.

دايىن ءونىمنىڭ نەگىزگى تۇتىنۋشىلارى قازاقستاننىڭ اياق كيىم، تىگىن فابريكالارى، اتەلە، بىلعارى- گالانتەرەيا، ەر- تۇرمان سەحتارى جانە رەسەي مەن تۇركيانىڭ اياق كيىم فابريكالارى. بىلعارى جارتىلاي فابريكاتىن وتكىزۋ نارىعى - يتاليا، تۇركيا، ءۇندىستان، قىتاي، رەسەي، يسپانيا، پورتۋگاليا.

«كيىم، اياق كيىم، گالانتەرەيا ونىمدەرىن ءوندىرۋ ءۇشىن شاعىن جانە ورتا بيزنەس كاسىپورىندارىن وتاندىق شيكىزاتپەن تولىق قامتاماسىز ەتۋ قاجەت. سوندا قازاقستاندىق ونىمدەر يمپورتتىق ونىمدەرمەن باسەكەلەسە الاتىن بولادى. سونداي- اق، بۇل بولاشاقتا وتاندىق جەڭىل ونەركاسىپتىڭ دامۋىنا سەرپىن بەرەدى، - دەلىنگەن مينيسترلىك تاراتقان حابارلامادا.