وسكەمەن تۇرعىنى تۇينەمەدەن كوز جۇمدى: كارانتين جاريالاندى
19 - قىركۇيەك كۇنى سانيتارلىق اۆياتسيانىڭ كومەگىمەن قاتونقاراعاي اۋدانىنان وبلىس ورتالىعىنا جەتكىزىلگەن تۇرعىن بۇگىن قايتىس بولدى. ونىڭ تۇينەمە اۋرۋىنان كوز جۇمعانى راستالدى. كىشى نارىن اۋىلىنىڭ تۇرعىنىنا ىندەت ءوزى سويعان تايىنشا ەتىنەن جۇقتى دەگەن كۇدىك بار. اۋرۋ بەلگىلەرى مارقۇمنىڭ دەنەسىنەن ءبىر اپتادان كەيىن بىلىنە باستاعان. اۋەلى اۋداندىق ينفەكتسيالىق ارۋحاناعا تۇسكەن ناۋقاس كەيىن وسكەمەنگە الدىرىلعان بولاتىن. ول مالدىڭ ەتىن اۋىلداستارى دا تۇتىنعان بولىپ شىقتى.
مارقۇمنىڭ تۇينەمەدەن كوز جۇمعانىن ەپيدەميولوگتار رەسمي راستاپ وتىر.
«مارقۇمنىڭ دياگنوزى ناقتىلاندى. قازىر وبلىستىق ۆەتەريناريا باسقارماسىنىڭ باسشىلارىمەن بىرگە قاتونقاراعاي اۋدانىندا ءجۇرمىز. اۋرۋ مالدىڭ ەتىن ساتىپ العان 35 ادامدى ءجىتى باقىلاۋعا الدىق. ازىرگە ولاردىڭ ەشبىرىنەن اۋرۋ بەلگىلەرى بايقالعان جوق. دەسە دە كۇنىنە ەكى مارتە تەكسەرىپ وتىرامىز. ال كىشى نارىن اۋىلىندا بۇگىننەن باستاپ كارانتين جاريالاندى. 14 كۇن بويى بۇل اۋىلدان ەت شىعارۋعا نەمەسە ەت كىرگىزۋگە بولمايدى. كارانتيندىك مەرزىم بارىسىندا نازارداعى 35 ادامنىڭ دەنساۋلىعىن باقىلاۋدا ۇستايمىز. قازىر قايعىلى وقيعانىڭ جاي- جاپسارىن انىقتاۋ ءۇشىن كەشەندى تەكسەرۋ باستالدى. اۋداندىق ۆەتەريناريا قىزمەتىنىڭ جۇمىسىن مۇقيات تەكسەرەتىن بولامىز» - دەيدى ش ق و بويىنشا قوعامدىق دەنساۋلىقتى ساقتاۋ دەپارتامەنتىنىڭ باسشىسى عازەز سۇلەيمەنوۆ.
مارقۇمدى جەر قوينىنا تاپسىرۋ ءراسىمى ەرتەڭ كىشى نارىن اۋىلىندا وتەدى.
«كارانتيندىك تالاپتار بويىنشا مارقۇمنىڭ جەرلەۋ راسىمىنە ەشكىم قاتىستىرىلمايدى. ال بەيىتى بەتوندالىپ، زالالسىزداندىرىلادى» ، - دەدى عازەز سۇلەيمەنوۆ.
اۆتور: ەسىمجان ناقتىباي