نۇرسۇلتان نازاربايەۆ: مەن ءۇشىن باستى ماقساتتاردىڭ ءبىرى - قازاقستاندىق انالاردىڭ باقىتى
بۇگىن اقتوبەدە «اناعا تاعزىم» ورتالىعى اشىلدى. بۇعان دەيىن حابارلاعانىمىزداي، حالىق قارجىسىنا سالىنعان جاڭا عيمارات قىز- كەلىنشەكتەرگە تاربيە بەرىپ، جاستاردىڭ بوس ۋاقىتىن ءتيىمدى وتكىزۋىنە سەپتىگىن تيگىزەدى. كەيىن اقتوبەدەگى ونەر ورتالىعىندا انالار سلەتى ءوتتى. سلەت كەزىندە وبلىس اكىمى بەردىبەك ساپاربايەۆ ەلباسى نۇرسۇلتان نازاربايەۆتىڭ قۇتتىقتاۋىن جەتكىزدى.
«رۋحاني جاڭعىرۋ» باعدارلاماسى اياسىندا العاش رەت ءوتىپ جاتقان انالار سلەتى - ەلىمىزدەگى وتباسىلىق احۋالدى جاقسارتۋعا باعىتتالعان ماڭىزدى شارا. انا - ءاربىر شاڭىراقتىڭ، سونداي- اق تۇتاس وتانىمىزدىڭ تىرەگى. ال قازاقستاندىق انالاردىڭ الەۋمەتتىك جاعدايى جاقسى بولىپ، ۇرپاعىنىڭ بولاشاعىنا الاڭداماي، باقىتتى عۇمىر كەشۋى - مەن ءۇشىن ەڭ باستى ماقساتتاردىڭ ءبىرى. سول سەبەپتى «قازاقستان-2050» ستراتەگياسىندا «انا مەن بالانى قورعاۋ - مەملەكەتتىڭ الەۋمەتتىك ساياساتىنىڭ اسا ءبىر ماڭىزدى بولىگى» دەپ جاريالادىم. تاۋەلسىزدىكتىڭ العاشقى جىلدارىنان باستاپ قازاقستاندا وتباسىن نىعايتۋ ءىسى دايەكتى تۇردە جۇرگىزىلىپ كەلەدى. ەلىمىزدەگى ايەل ىستەرى جانە وتباسى- دەموگرافيالىق ساياسات جونىندەگى ۇلتتىق كوميسسيانىڭ جۇمىسى ءاردايىم مەنىڭ ءجىتى نازارىمدا. انالاردىڭ قۇقىعىن قورعاپ، الەۋمەتتىك جاعدايىن جاقسارتۋمەن بىرگە، اناعا دەگەن سىي- قۇرمەتتى ارتتىرۋعا، ونىڭ قوعامداعى مارتەبەسىن كوتەرىپ، مەرەيىن اسىرۋعا، وسى ارقىلى وتباسى ينستيتۋتىن نىعايتۋعا ەرەكشە كوڭىل بولىنۋدە. رۋحاني تۇرعىدان جاڭعىرىپ، كەمەل ازاماتتار تۇراتىن گۇلدەنگەن ەل بولۋعا ۇمتىلعان قازاقستاننىڭ دامۋىنا انالاردىڭ ىقپالى شەكسىز. دۇنيەگە ۇرپاق اكەلىپ، وعان ۇلاعاتتى تاربيە بەرۋ - جاۋاپتى دا قاسيەتتى مىندەت. ەلىمىزدىڭ الەمدىك وركەنيەت كوشىنىڭ باسىندا جۇرۋىنە ءاربىر قازاقستاندىق انا ۇلەس قوسادى دەپ سەنەمىن» ، - دەپ جازىلعان حاتتا.
اقتوبەدەگى انالار سلەتىنە ەتنوگراف- جازۋشى زەينەپ احمەتوۆا، ق ر بالالار ءىسى جونىندەگى ۋاكىل ساۋلە ايتپايەۆا، اقىن مارفۋعا ايتحوجينا، ءانشى بيبىگۇل تولەگەنوۆا، تاتيانا بۋرميستروۆا، كومپوزيتور، اقىن ەلەنا ءابدىحالىقوۆا سەكىلدى ءبىرقاتار تانىمال تۇلعالار قاتىستى.
