بۇركىتشى قىز استانادا ءبىلىم الادى

استانا. قازاقپارات - دۇنيەجۇزىنە تانىمال بۇركىتشى قىز ايشولپاندى ا ق ش- تىڭ گارۆارد پەن ۇلىبريتانيانىڭ وكسفورد ۋنيۆەرسيتەتىنە وقۋعا شاقىردى.

ءبىراق ول شەتەلگە بارۋ ءۇشىن ارنايى دايىندىق كۋرسىنان ءوتۋى كەرەك، دەپ حابارلايدى قازاقپارات ءتىلشىسى.

« ءبىلىم- يننوۆاتسيا» حالىقارالىق قوعامدىق قورىنىڭ پرەزيدەنتى دارحان وتە ەرماحان ۇلىنىڭ ايتۋىنشا، ايشولپان استاناداعى pectrum x حالىقارالىق مەكتەبىندە وقي الادى. وعان 20 مىڭ دوللار دا بولىنەدى.

«ەندى، گارۆاردقا بارۋ ءۇشىن دايىندىق كەرەك قوي. ءتىل جاعىنان جانە تاعىسىن تاعى. اقشاسى دايىن. اناسى موڭعولياعا بارعاننان كەيىن اكەسىمەن اقىلداسامىز دەدى. ا ق ش- قا باراتىن بولسا، الدىمەن استاناعا كەلىپ، ءبىر جىلداي وسىندا دايىندالادى» ، - دەدى دارحان وتە ەرماحان ۇلى قازاقپارات تىلشىسىنە بەرگەن سۇحباتىندا.

ايشولپاننىڭ اناسى الماگۇل كوكسەگەن دە وسى اقپاراتتى راستادى. ونىڭ سوزىنە قاراعاندا، بىلتىر ايشولپانعا شەتەلدىڭ بىرنەشە ۋنيۆەرسيتەتى شاقىرۋ جىبەرگەن.

« ءيا، ءبىز ءالى موڭعولياعا بارىپ اقىلداسامىز. ايشولپان الدىمەن استاناعا كەلەدى. وسى جەردە دايىندالادى. سودان كەيىن شەتەلگە وقۋعا بارادى» ، - دەيدى ا. كوكسەگەن.

ال ايشولپاننىڭ ءوزى گارۆاردتى تاڭداعانىن جەتكىزدى.

«مەن گارۆاردتى تاڭدادىم. سول جاققا بارىپ، وقىعىم كەلەدى» ، - دەپ اتاپ كورسەتتى ا. نۇرعايىپ قىزى.

ايتا كەتەيىك، بۇگىن استانادا «Qazaqstan» ر ت رك تاپسىرىسى بويىنشا تۇسىرىلگەن «كوشپەندىلەر» اتتى دەرەكتى فيلمگە ارنالعان باسپا ءسوز ءماسليحاتى ءوتتى. وعان بۇركىتشى قىز ايشولپان نۇرعايىپ قىزى دا كەلدى. ول اتالعان فيلمنىڭ العاشقى سەرياسىنا تۇسكەن. «Qazaqstan» ر ت ر ك باسقارما ءتوراعاسى ەرلان كاريننىڭ ايتۋىنشا، اتالعان جوبانىڭ نەگىزگى ماقساتى - شەتەلگە قونىس اۋدارعان قانداستىرىمىزدىڭ ءومىرى مەن تۇرمىس- سالتىن كوپشىلىككە كورسەتۋ.

«فيلمدە موڭعوليا، اۋعانستان، قىتاي، تۇركيا، يران جانە تاعى باسقا دا مەملەكەتتەردە تۇراتىن قازاقتاردىڭ تاعدىرى جايىندا باياندالادى. ونى ءتۇسىرۋ وڭايعا تۇسپەدى. سەبەبى، تەحنيكانى اپارۋ كەرەك. ءتۇسىرۋ جۇمىستارىن الدىن الا كەلىسۋ كەرەك جانە تاعىسىن تاعى. ءبىر رەت يراندا جەرگىلىكتى پوليتسيا ءتۇسىرۋ توبىنىڭ تەحنيكاسىن تاركىلەدى. دەگەنمەن، ءبىز ءوز جوبامىزدى ويداعىداي جاساپ شىقتىق. «كوشپەندىلەر» دەرەكتى فيلمدەر توپتاماسى ۇلتتىق ارنا ەفيرىنەن 14 - قازاننان باستاپ 23 - جەلتوقسانعا دەيىن كورسەتىلەدى» ، - دەيدى ە. كارين.

  ال ايشولپان قۇسبەگىلىك ونەرىنە قالاي قىزىعىپ، قاي ۋاقىتتان باستاپ اينالىسقانىن ايتىپ بەردى.

«قازاقستانداعى جارىستارعا كەلۋگە دايىنمىن» ، - دەيدى ايشولپان.

موڭعوليادا تۇراتىن قازاق قىزى ايشولپان نۇرعايىپ قىزى 13 جاسىندا بۇركىتشىلەر جارىسىندا جەڭىمپاز اتاندى. ول جايىندا اعىلشىننىڭ «Daily Mail» باسىلىمى دا جازدى. ال رەجيسسەر وتتو بەلل "بۇركىشى قىز" اتتى دەرەكتى ءفيلمدى ءتۇسىردى. اتالعان تۋىندى وسكار سىيلىعىنا ۇسىنىلعان بولاتىن.

سول كەزدە فيلم اۆتورلارى ءتۇسىرىلىم جۇمىستارىن قالاي جۇرگىزگەنىن ايتىپ بەرگەن ەدى.

 ال اۆستراليا ءانشىسى سيا فەرلەر «Angel by the Wings» اتتى انىنە كليپ شىعاردى. اتالعان شىعارما موڭعولياداعى بۇركىتشى قازاق قىزى ايشولپان نۇرعايىپ قىزى تۋرالى دەرەكتى فيلمنىڭ رەسمي ساۋندترەگى بولىپ سانالادى.