قانات يسلام ماقتاارالدىق جاس بوكسشىلارعا ماستەر- كلاسس وتكىزدى

 استانا. قازاقپارات -  تۇركىستان وبلىسى، ماقتاارال اۋدانىنا تانىمال كاسىپقوي بوكسشى، ەل ماقتانىشى قانات يسلام قوناققا كەلدى. اتاكەنت كەنتىنىڭ «الپامىس باتىر» ستاديونىنا جينالعان جۇرت بىلعارى قولعاپ شەبەرىن قوشەمەتپەن كۇتىپ الدى.

كوپشىلىك الدىندا ءسوز سويلەگەن اۋدان اكىمى باقىت اسانوۆ جاڭادان قۇرىلعان اۋدانعا تانىمال بوكسشىنىڭ كەلۋى ۇلكەن قۋانىش ەكەنىن، جەرگىلىكتى جەردەن مىقتى سپورتشىلاردى، كاسىپقوي بوكسشىلاردى دايىنداپ شىعارۋ ءۇشىن قانات يسلام سياقتى تۇلعالاردى ناسيحاتتاۋ جالعاساتىنىن اتاپ ءوتتى. سونداي- اق اۋدان اكىمى قازاق باتىرىنىڭ استىنا تۇلپار مىنگىزىپ، ۇستىنە شاپان جاپتى. قانات يسلاممەن بىرگە كەلگەن تۇيە پالۋان، «قازاقستان بارىسى» تۋرنيرىنىڭ جۇلدەگەرى جۇمانازار ەرسۇلتانوۆقا دا قۇرمەت كورسەتىلدى. قانات يسلام ماقتاارالدىق جاس بوكسشىلارعا اقىل- كەڭەسىن ايتىپ، ماستەر- كلاسس وتكىزدى. ال ماقتاارال اگروكوللەدجىندە ستۋدەنتتەرمەن كەزدەسىپ، جاستاردىڭ كوكەيىندە جۇرگەن سۇراقتارىنا جاۋاپ بەردى.

عالىمجان ەلشىباي، «ەگەمەن قازاقستان» تۇركىستان وبلىسى.