بۇركىتشى قىز ايشولپان: قازاقستانداعى جارىستارعا قاتىسۋعا دايىنمىن
ايشولپان تۋرالى فيلم وسكار سىيلىعىنا دا ۇسىنىلدى، دەپ حابارلايدى قازاقپارات ءتىلشىسى.
بۇگىندە ايشولپاننىڭ جاسى - 17 دە. «Qazaqstan» ر ت ر ك «كوشپەندىلەر» اتتى دەرەكتى فيلمدەر توپتاماسىنىڭ العاشقى سەرياسىن ايشولپانعا ارنادى. اتالعان جوبا اياسىندا بۇركىتشى قىز العاش رەت قازاقستانعا كەلىپ، قۇسبەگىلىك ونەرىمەن قالاي اينالىسىپ كەتكەنىن ايتىپ بەردى.
«قۇسبەگىلىك - جەتى اتادان جالعاسىپ كەلە جاتقان ءداستۇر، ەكى مىڭ جىلدىق تاريحى بار سالت. ءوزىم كىشكەنتاي كەزىمنەن باستاپ بۇركىتپەن بىرگە ءوستىم. اعام دا بۇركىتشى بولدى. ول وقۋدى ءبىتىرىپ، اسكەرگە كەتكەننەن كەيىن بۇركىتى ۇيدە قالدى. مەن اكە- شەشەمنىڭ رۇقساتىن الىپ، بۇركىتتى ءوزىم ۇستادىم. سودان اكەممەن بىرگە تاۋ- تاسقا شىقتىق، اڭ ۇستادىق» ، - دەدى ا. نۇرعايىپ قىزى استانادا وتكەن باسپا ءسوز ءماسليحاتىندا.
ونىڭ ايتۋىنشا، ءوزى ۇستاپ جۇرگەن بۇركىتتىڭ اتى - اق قانات. ونىمەن قاسقىر العان كەزدەرى دە بولعان.
«مەن بۇركىتتىڭ ارقاسىندا كوپتەگەن ەلدەردە بولدىم، كينوعا ءتۇستىم. وسكارعا دا ۇسىندى. موڭعوليادا مەنىڭ اتاعىم شىققاننان كەيىن بۇركىتشى قىزدار كوبەيدى. قازاقستاندا قۇسبەگىلىك جارىستار بولسا، كەلۋ جاعىن ويلاستىرامىن. ارينە، قاتىسامىن» ، - دەپ اتاپ كورسەتتى ا. نۇرعايىپ قىزى.
ايشولپاننىڭ اناسى الماگۇل كوكسەگەن قىزىنىڭ قۇسبەگىلىكپەن اينالىسامىن دەگەن تىلەگىن بىردەن قابىل المادى. ءبىراق ايشولپاننىڭ قىزىعۋشىلىعىن كورگەننەن كەيىن قارسىلىق بىلدىرگەن جوق.
«ەندى، قىز بالا ۇيدە وتىرىپ، شارۋاسىن ىستەۋى كەرەك. ءبىزدى سولاي ۇيرەتتى. ءبىراق ول ءوزى تالاپتانىپ، بۇركىتپەن اڭعا شىعامىن دەگەننەن كەيىن قارسى بولعان جوقپىز. ارينە، قىز بالا ءۇشىن تاۋ- تاسقا شىعۋ وڭاي ەمەس. ءبىزدىڭ جاقتا قىستا 40 گرادۋسقا دەيىن سۋىق بولادى. سودان ءبىز ونى جىلى كيىندىرىپ، قويا بەرەمىز» ، - دەيدى ا. كوكسەگەن.
ايشولپاننىڭ ءوزى قيىندىقتان قورىقپايدى ەكەن.
ء«وز ماقساتىڭا جەتۋ ءۇشىن ءار نارسەگە توزە ءبىلۋ كەرەك» ، - دەدى ا. نۇرعايىپ قىزى قازاقپارات تىلشىسىنە بەرگەن سۇحباتىندا.
ايتا كەتەيىك، 2014 -جىلى اعىلشىننىڭ «Daily Mail» باسىلىمى قۇسبەگىلىك ونەرىن يگەرگەن 13 جاستاعى قازاق قىزى تۋرالى ماقالا جاريالاپ، ايشولپاندى بۇكىل الەمگە تانىمال ەتكەن بولاتىن. وسىدان كەيىن رەجيسسەر وتتو بەلل «بۇركىتشى قىز» (The Eagle Huntres) اتتى دەرەكتى فيلم ءتۇسىردى. اتالعان فيلم وسكار سىيلىعىنا ۇمىتكەر ۇزدىك 15 فيلمنىڭ قاتارىنا ەندى. سول كەزدە فيلم اۆتورلارى ءتۇسىرىلىم جۇمىستارىن قالاي جۇرگىزگەندەرىن ايتىپ بەردى.
ال اۆستراليا ءانشىسى سيا فەرلەر «Angel by the Wings» اتتى انىنە كليپ شىعاردى. اتالعان شىعارما موڭعولياداعى بۇركىتشى قازاق قىزى ايشولپان نۇرعايىپ قىزى تۋرالى دەرەكتى فيلمنىڭ رەسمي ساۋندترەگى بولىپ سانالادى.