قازاقستاندىق جازۋشىلاردىڭ شىعارمالارى پارسى وقىرماندارىنا جول تارتادى
سالتاناتتى ءراسىم استانادا «قازىرگى زامانعى ءسوز ەنەرگياسى» اتتى حالىقارالىق ادەبي فورۋمى اياسىندا ءوتتى. فورۋمنىڭ ەكىنشى كۇنى پروزا، پوەزيا، دراماتۋرگيا جانە اۋدارما ىسىندەگى وزەكتى ماسەلەلەر 4 سەكتسياعا ءبولىنىپ تالقىلانۋدا.
«قازاقستاننىڭ زاماناۋي ادەبيەتى پارسى تىلىنە وتە از اۋدارىلعان. بۇگىنگى مەموراندۋم پارسى اۋديتورياسىنا قازاق ادەبيەتىن ناسيحاتتاۋعا جانە اۋدارۋعا سەرپىن بەرەدى دەپ ۇمىتتەنەمىن. ەكىنشى جاعىنان، كلاسسيكالىق پارسى ادەبيەتى بارشا الەمگە تانىمال بولسا دا، قازىرگى پارسى ادەبيەتىن بىلەتىندەر از. بۇگىنگى كەلىسىمنەن سوڭ، قوس حالىققا قازاق جانە پارسى ادەبيەتىنىڭ زاماناۋي وكىلدەرى كەڭىنەن تانىلارىنا سەنىمدىمىن» ، - دەپ اتاپ ءوتتى يران جازۋشىلار قاۋىمداستىعىنىڭ ءتوراعاسى، اقىن، جازۋشى حادي ساەري كياساري.
ءوز كەزەگىندە قازاقستان جازۋشىلار وداعىنىڭ باسشىسى ۇلىقبەك ەسداۋلەت ەكى ەلدىڭ باعزىدان قالىپتاسقان ادەبي بايلانىسىن دامىتا تۇسۋگە نيەتتى ەكەنىن جەتكىزدى.
«پارسى ادەبيەتى الەمگە اسىل قازىنالار سىيلاعان باي ادەبيەت بولىپ سانالادى. شاحنامادان باستاپ، رۋميدىڭ، ءجاميدىڭ، ساعديدىڭ، باسقا دا شىعىس جۇلدىزدارىنىڭ شىعارمالارى بىزدە اۋدارىلىپ كەلگەن. ءاربىر بۋىن ۇلى اقىندار مەن جازۋشىلاردى قايتالاپ اۋدارىپ ۇسىنىپ وتىرادى. بىزدە تۇرماعامبەت ىزتىلەۋوۆتان باستاپ، پارسى تىلىنەن اۋداراتىن ۇلكەن اۋدارماشىلار مەكتەبى قالىپتاسقان. الماتىلىق سافار ابدۋللو اۋدارعان م. اۋەزوۆتىڭ اڭگىمەلەرى، ابايدىڭ قارا سوزدەرى وسىمەن ءتورتىنشى رەت شىعىپ جاتىر. سول جولدى جالعاستىرىپ، قازاق ادەبيەتىن پارسى وقىرماندارىنا تانىستىرا ءتۇسۋدى كوزدەپ وتىرمىز» ، - دەدى ۇلىبەك ەسداۋلەت.