قازاقستان مەن وزبەكستان عارىشقا جەر سەرىگىن ۇشىرۋعا نيەتتى

استانا. قازاقپارات -  ق ر قورعانىس جانە ايەروعارىش ونەركاسىبى مينيسترلىگى الداعى جوسپارلارىمەن ءبولىستى. سونىڭ ىشىندە وزبەكستانمەن جەر سەرىگىن جاساۋ جوباسى دا بار، دەپ حابارلايدى قازاقپارات ءتىلشىسى.

حالىقارالىق اسكەري- تەحنيكالىق ىنتىماقتاستىق دەپارتامەنتىنىڭ ديرەكتورى اسلانبەك سىرلانوۆتىڭ ايتۋىنشا، بۇگىندە قازاقستان مەن وزبەكستاننىڭ بىرلەسكەن جەر سەرىگىن جاساۋعا قاتىستى ناقتى ۇسىنىستار بار. اتالعان اپپارات ەكى مەملەكەتكە عانا ەمەس، ايماقتىڭ باسقا دا ەلدەرىنە قىزمەت كورسەتە الادى.

«قازىرگى كەزدە ءبىزدىڭ وزبەك ارىپتەستەرىمىز شەتەلدىڭ جەر سەرىكتەرىن قولدانىپ كەلەدى. سوندىقتان بىرلەسىپ ءبىر جەر سەرىگىن قۇراستىرۋ تۋرالى ۇسىنىس جاسالدى»، - دەدى ا. سىرلانوۆ قازاقستان مەن وزبەكستاننىڭ ىنتىماقتاستىعىنا ارنالعان حالىقارالىق كونفەرەنسيادا.

بۇدان بولەك، ورتالىق ازيا ەلدەرىنىڭ ىنتىماقتاستىعى اياسىندا جەردى قاشىقتان ءتۇسىرۋدىڭ بەس بىردەي جەر سەرىگىن جاساپ شىعارۋ ۇسىنىلىپ وتىر. اتالعان اپپاراتتار 5 مەترگە دەيىنگى زاتتاردى انىق تۇسىرە الادى.

«سوندا ورتالىق ازيانىڭ ءاربىر مەملەكەتى ءبىر- ءبىر جەر سەرىگىن باسقارىپ وتىرادى. الايدا بەس بىردەي اپپاراتتىڭ مالىمەتتەرىن قولدانۋعا مۇمكىندىك بار. وسىلايشا، كۇن سايىن جاڭا سۋرەتتەردى الۋعا بولادى. وسىنىڭ ءبارىن قازاقستان ۇسىنىپ وتىر»، - دەپ اتاپ كورسەتتى ا. سىرلانوۆ.

ايتا كەتەيىك، بۇگىن استانادا جاڭا گەوساياسي جاعدايداعى قازاقستان مەن وزبەكستان ىنتىماقتاستىعىن دامىتۋعا ارنالعان حالىقارالىق كونفەرەنسيا باستالدى. شارانىڭ ۇيىمداستىرۋشىسى - ق ر پرەزيدەنتى جانىنداعى قازاقستاننىڭ ستراتەگيالىق زەرتتەۋلەر ينستيتۋتى. كونفەرەنسياعا وزبەكستان پرەزيدەنتى جانىنداعى ايماقارالىق جانە ستراتەگيالىق زەرتتەۋلەر ينستيتۋتىنىڭ باسشىلىعى دا كەلدى. بۇدان بولەك، ەكى ەلدىڭ بەلدى ساراپشىلارى قاتىسۋدا. شارا اياسىندا ەكى ينستيتۋت ءوزارا ىنتىماقتاستىق تۋرالى مەموراندۋمدى راسىمدەدى.

اۆتور: ارمان اسقاروۆ