سەنات ءتوراعاسى زاڭ شىعارۋ پروتسەسىندەگى كەمشىلىكتەردى اتادى
بۇل تۋرالى بۇگىن ق ر پارلامەنتى سەناتىنداعى زاڭ شىعارۋ پروتسەسىن جەتىلدىرۋ ماسەلەلەرى جونىندەگى ۇكىمەت ساعاتىندا جوعارى پالاتا سپيكەرى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
«پارلامەنتتىڭ وكىلەتتىگىن كۇشەيتۋ جۇمىسى زاڭ شىعارۋشى تۇلعالاردىڭ زاڭ جوبالارىن ازىرلەۋ جانە ولارعا باستاماشىلىق جاساۋ ءتارتىبىن رەتتەۋدى تالاپ ەتەدى. وسى جەردە ءبىرىنشى ماسەلە تۋىندايدى. بۇل - ءالى كۇنگە دەيىن وزگەرىسسىز قالىپ وتىرعان زاڭ جوبالاۋ جۇمىسىن جوسپارلاۋ دەڭگەيىنىڭ تومەندىگى، ول زاڭ شىعارۋ جۇمىسىنداعى جۇيەسىزدىككە، «شاشىراڭقىلىققا»، ابدەن ءپىسىپ-جەتىلگەن تۇيتكىلدەردىڭ تىم كەش شەشىلۋىنە جانە كوديفيكاتسيالانعان اكتىلەردىڭ رەتسىز تۇزەتىلۋىنە اكەلىپ سوعادى»، - دەدى قاسىم-جومارت توقايەۆ.
ونىڭ ايتۋىنشا، سوندىقتان زاڭ نورمالارى قۇقىقتىق احۋال جاساۋدىڭ ورنىنا، تەز وزگەرىپ وتىراتىن قۇبىلمالى جاعدايلاردىڭ سالدارى بولىپ تابىلادى. پارلامەنت قابىلداعان زاڭنامالىق اكتىلەرگە كۇشىنە ەنگەن كەزدەن باستاپ ءبىر جىل ىشىندە باسقا زاڭدار نەگىزىندە جۇزگە جۋىق وزگەرتۋلەر ەنگىزىلەتىن جاعدايلار دا كەزدەسەدى.
«كوپ جاعدايلاردا ءبىزدىڭ زاڭدارىمىز ەكونوميكا مەن قوعام ومىرىندەگى شۇعىل پروبلەمالاردى شەشۋگە باعىتتالادى. سونىڭ سالدارىنان بۇل زاڭداردىڭ مازمۇنىندا اعىمداعى جاعدايعا دەگەن تۇجىرىمدامالىق كوزقاراس پەن مەملەكەتتىڭ دامۋىنا وڭ ىقپال ەتەتىن ۇردىستەردىڭ تاپشى ەكەنى بىردەن بايقالادى. ءبىرقاتار زاڭداردان ىشكى قاراما-قايشىلىقپەن قاتار تەڭگەرىمدىلىكتىڭ جوقتىعىن كورۋگە بولادى. زاڭ ءبىر ۇعىمنىڭ ءوزىن الۋان ءتۇرلى ماعىنادا ءتۇسىندىرۋى مۇمكىن. بۇل جاعداي قوعامنىڭ پارلامەنت پەن ۇكىمەتتىڭ قىزمەتىنە دەگەن سىني كوزقاراسىن تۋعىزارى انىق»، - دەدى ول.
سەنات سپيكەرى ەلىمىزدىڭ زاڭنامالىق جۇيەسىندەگى ماڭىزدى مىندەتتەردىڭ ءبىرى قازاقستاندى دامىعان 30 ەلدىڭ قاتارىنا ەنگىزۋدى قۇقىقتىق قامتاماسىز ەتۋ ەكەندىگىنە دە نازار اۋدارتتى.
«وسى ورايدا، ۇكىمەتتىڭ جوعارى رەيتينگتىك كورسەتكىشتەرگە ساي بولۋعا باعىتتالعان تەرەڭ ۇمتىلىسىن اتاپ ءوتۋ قاجەت. ءاربىر مەملەكەتتىك ورگان ءوز مىندەتتەرىنە عانا سايكەس كەلەتىن قاعيداتتار مەن ادىستەر نەگىزىندە حالىقارالىق رەيتينگتەرگە قول جەتكىزۋ مىندەتىن قويدى. سونىمەن قاتار، الدىڭعى قاتارلى دامىعان ەلدەردىڭ توبىنا كىرۋ شارالارى ۇكىمەتتىڭ بارلىق ورگاندارىنىڭ وسى باعىتتاعى ۇيلەسىمدى جۇمىسىن قاجەت ەتەدى. حالىقارالىق ۇيىمدارمەن ءىس- قيمىل جاساۋدىڭ ماڭىزى زور ەكەنى كۇمانسىز، ءبىراق ولاردىڭ تالاپتارى مەن سۇرانىستارى، ەڭ الدىمەن، ۇلتتىق مۇددەلەردى قامتاماسىز ەتۋگە جانە قازاقستان ازاماتتارىنىڭ مۇڭ-مۇقتاجدارى مەن قاجەتتىلىكتەرىن قاناعاتتاندىرۋعا باعىتتالعان زاڭ شىعارۋ جۇمىسىنا توسقاۋىل بولماۋى ءتيىس»، - دەدى.
ق. توقايەۆتىڭ پايىمىنشا، اتالعان پروتسەستى اناعۇرلىم كەشەندى، ۇيلەسىمدى جانە ونى حالىقارالىق قوعامداستىقپەن قاتار ەلىمىزدىڭ ازاماتتارىنا ۇعىنىقتى ەتۋ ءۇشىن ونىڭ كەزەڭدەرى مەن شارتتارىن قۇقىقتىق رەتتەۋ ماسەلەسىن قاراۋىمىز قاجەت.