قازاقستان جاڭا ساندىق فورماتقا كوشۋ ۇدەرىسىنەن تىس قالماۋى كەرەك - ەلباسى
شارا باراسىندا ق ر ۇكىمەت باسشىسىنىڭ ءبىرىنشى ورىنباسارى اسقار مامين ق ر پرەزيدەنتى نۇرسۇلتان نازاربايەۆتىڭ فورۋم قاتىسۋشىلارىنا ارنالعان قۇتتىقتاۋ ءسوزىن وقىپ بەردى، دەپ حابارلايدى قازاقپارات.
«ماشينا جاساۋ ەكونوميكانىڭ نەگىزگى سالالارىنىڭ ءبىرى. مەملەكەت بۇل باعىتتىڭ ورنىقتى دامۋى ءۇشىن بارىنشا قولداۋ كورسەتىپ كەلەدى. 2017-جىلى ماشينا جاساۋ ءونىمىنىڭ كولەمى 1 تريلليون تەڭگەگە جۋىق بولدى. بيىلعى فورۋمنىڭ نەگىزگى يدەياسى ماشينا جاساۋ سالاسىنداعى ءتورتىنشى ونەركاسىپتىك ريەۆوليۋتسيا، جاھاندىق تەحنولوگيالىق پروگرەستىڭ قازىرگى بولمىسىنا سايكەس كەلەدى. ماشينا جاساۋ ءىسى قارقىندى دامىپ، جۇرگىزۋشىسى جوق اۆتوكولىكتەر، روبوتتاندىرىلعان زاۋىتتار جانە سۋتەگى وتىنىمەن جۇرەتىن ماشينالار بۇگىندە وزىق ەلدەر ءۇشىن ۇيرەنشىكتى قۇبىلىسقا اينالدى»، - دەلىنگەن ەلباسىنىڭ سوزىندە.
سونىمەن قاتار مەملەكەت باسشىسى بۇكىل الەم جاڭا ساندىق فورماتقا كوشىپ جاتقانىن، قازاقستان دا بۇل ۇدەرىستەن تىس قالماۋى كەرەك ەكەنىن قاداپ ايتتى.
«ماشينا جاساۋ سالاسىن دامىتۋدىڭ 2019-2030-جىلدارعا ارنالعان كەشەندى جوسپارى فورۋمدا تالقىلاناتىن ماڭىزدى تاقىرىپتاردىڭ ءبىرى بولماق. جاھاندىق تەحنولوگيالىق ۇدەرىستەرگە ساي وندىرىستە جاڭعىرتۋدى كوزدەيتىن اتالعان باعدارلامالىق قۇجات سالانى دامىتۋدىڭ ستراتەگيالىق باعدارىن ايقىندايدى. ءىس-شارا اياسىندا ناتيجەلى پىكىرتالاس بولىپ، وسى سالادا وزەكتى ماسەلەلەرگە قاتىستى ناقتى ۇسىنىستار ازىرلەنەدى دەپ سەنەمىن»، - دەدى ن. نازاربايەۆ.
ايتا كەتەيىك، فورۋم ء«تورتىنشى ونەركاسىپتىك ريەۆوليۋتسيا جاعدايىندا دامۋدىڭ جاڭا مۇمكىندىكتەرى» تاقىرىبىندا ءوتىپ جاتىر.
فورۋمدا تەك ماشينا جاساۋ سالاسىنىڭ عانا وزەكتى ماسەلەلەرى ەمەس، سونىمەن قاتار بارلىق وڭدەۋ ونەركاسىبىنىڭ ءىرى جۇيەلى پروبلەمالارى تالقىلانادى.
يندۋستريالدى-يننوۆاتسيالىق دامۋ مەملەكەتتىك باعدارلاماسىنىڭ ءبىرىنشى بەس جىلدىعىن ىسكە اسىرۋ جىلدارىندا ماشينا جاساۋ سالاسى ەلىمىزدەگى ەڭ قارقىندى دامىعان سالالاردىڭ ءبىرى بولدى. ءوندىرىس كولەمى 2010-جىلعى 376 ميلليارد تەڭگەدەن 2014 -جىلى 870 ميلليارد تەڭگەگە دەيىن، ياعني 2,3 ەسەگە ۇلعايدى. وڭدەۋ ونەركاسىبى كولەمىندەگى وتاندىق ماشينا جاساۋدىڭ ۇلەسى 9,7 پايىزدان 14,8 پايىزعا دەيىن ءوستى.
2018-جىلدىڭ 8 ايىنىڭ قورىتىندىسى بويىنشا ماشينا جاساۋ ءوندىرىسىنىڭ كولەمى 638,1 ميلليارد تەڭگەدەن اسىپ، ءوسىم 13,8 پايىزدى قۇرادى.