قىتايدا «استانا ارلاندارى» ءتورتىنشى مارتە چەمپيوندىق اتاققا تالاسادى
ق ر بوكس فەدەراتسياسىنىڭ باسپا ءسوز قىزمەتى حابارلاۋىنشا «Astana Arlans» WSB فينالىنا تولىقتاي دايىن. فينال قىتاي حالىق رەسپۋبليكاسىنىڭ وڭتۇستىك شىعىسىندا ورنالاسقان سيامىن قالاسى مەن تسزينتسزيان وڭىرىندە وتەدى. توپتىق كەزەڭدە قارسىلاس شاق كەلتىرمەگەن «استانا ارلانس» پەن «كۋبا دومادورەس» كوماندالارى 26-28 قىركۇيەك ارالىعىندا ءوزارا مىقتىنى انىقتايدى.
قوس قۇراما بوكسشىلارى وسىعان دەيىن ءۇش رەت كەزدەسىپ، ەكى مارتە قازاق كومانداسى باسىم تۇسسە، ءبىر رەت كۋبالىقتاردىڭ مەرەيى ۇستەم بولعان. «استانا ارلاندارى» مامىر ايىندا «بريتيش لاينحارتستتى» ۇتسا، «كۋبا دومادورەس» «فرانس فايتينگ رۋستەرستى» جەڭدى.
WSB حالىقارالىق بوكس قاۋىمداستىعى AIBA (Amateur International Boxing Association - حالىقارالىق اۋەسقوي بوكس قاۋىمداستىعى) ۇيىمىنا تيەسىلى قۇرىلىم. ونىڭ اياسىندا وتەتىن الەمدىك تۋرنير 2010-جىلدان باستاۋ العان. جارىسقا ءار ەلدىڭ كوماندالارى قاتىسادى. «استانا ارلاندارى» ازىرگە وسى بايراقتى باسەكەدە 3 رەت جەڭىسكە جەتكەن جالعىز كوماندا.
ال «كۋبا دومادورەس» بولسا 2 رەت باس جۇلدەگە قول جەتكىزگەن. يتاليالىق «Dolce Gabbana» مەن فرانسۋزدىڭ «France Fighting Roosters» قۇرامالارى ءبىر رەتتەن جەڭگەن.
اتالمىش تۋرنيرگە قاتىساتىن سپورتشىلاردىڭ بارلىعى اۋەسقوي بوكسشىلار. ءبىراق ادەتتە ەل بىرىنشىلىگىندە، وليمپيادا ويىندارىندا ءبىز كورىپ جۇرگەن بوكستان ايىرماشىلىعى بوكسشىلار كاسىپقوي بوكستاعى سياقتى كەۋدەلەرىنە ەشتەمە كيمەي شىعادى جانە باستارىن قورعايتىن شلەمدى تاقپايدى.
WSB حالىقارالىق قاۋىمداستىعى ءوزىن اۋەسقوي بوكس دارەجەسىندەگى ۇيىم ساناعانىمەن بوكسشىلارعا كاسىپقوي بوكستا دا ونەر كورسەتۋگە شەكتەۋ قويمايدى. سونىمەن قاتار، سپورتشىلارعا وليمپيادا ويىندارىنا دا قاتىسۋعا رۇقسات بەرىلگەن. ال قازىلىق جاعىنان كەلەتىن بولساق، اۋەسقوي بوكستان ايىرماشىلىعى بار. تۋرنير جەڭىمپازىن كاسىپقوي بوكستاعى سياقتى ءۇش تورەشىنىڭ بەرگەن باعاسىنىڭ ناتيجەسىنە قاراپ انىقتايدى.
اۆتور: كۇنسۇلتان وتارباي