دانيال احمەتوۆ زايسان اۋدانىن گازعا قىسقا مەرزىمدە قوسۋدى تاپسىردى

وسكەمەن. قازاقپارات - قازان ايىندا زايسان اۋدانىنىڭ توعىز اۋىلىنا كوپتەن كۇتكەن گاز بەرىلەدى، دەپ حابارلايدى قازاقپارات ءتىلشىسى.

بۇگىن «نۇر وتان» پارتياسىنىڭ بيۋرو ماجىلىسىندە زايسان اۋدانىنىڭ ەلدى مەكەندەرىن گازبەن قامتۋ ماسەلەسى قارالدى. وسى ماسەلە بويىنشا قۇرىلعان ارنايى كوميسسيا مۇشەلەرى گاز قۇبىرلارىنىڭ ءالى مەملەكەت مەنشىگىنە الىنباعانىن مالىمدەدى. كوميسسيا وكىلدەرىنىڭ ايتۋىنشا، گازعا قوسىلۋى ءتيىس 9 اۋىلدىڭ بىردە- ءبىر ۇيىنە گاز بەرىلمەگەن.

«جۇمىس توبى اۋىلداردى گازداندىرۋ جوباسى بويىنشا كەستەنىڭ بىرنەشە مارتە بۇزىلعانىن انىقتادى. 15 - قازان كۇنى جوبانىڭ باسىنا بارامىز. سول جەردە كوشپەلى وتىرىس وتەدى. وعان دەيىن جۇمىس توبى تەكسەرۋ جۇرگىزىپ، شىنايى جاعدايدى انىقتايدى. كوشپەلى ماجىلىسكە دەيىن 9 ەلدى مەكەن گازعا قوسىلماسا، قاتاڭ شارا قولدانامىز» - دەدى وبلىس اكىمى دانيال احمەتوۆ.

 اۋدان اكىمى تەمىربەك قاسىمجانوۆتىڭ ايتۋىنشا، كوگىلدىر وتىننىڭ يگىلىن كورۋى ءتيىس 1328 ءۇيدىڭ 520-سى گازعا قوسىلۋعا ءوتىنىش جازعانىن العا تارتتى. ال ازىرگە 157 ۇيگە عانا گاز بەرىلگەن. قالعان ۇيلەر 15 - قازانعا دەيىن تولىق قوسىلماق.

«5 - قازانعا دەيىن بارلىق ءۇي گازعا قوسىلاتىن بولسىن. ول ءۇشىن اۋداننىڭ اكىمىنە تىڭعىلىقتى ءىس اتقارىپ، ءاربىر تۇرعىنمەن جەكە جۇمىس ىستەۋ قاجەت» - دەدى دانيال احمەتوۆ.

اۆتور: ەسىمجان ناقتىباي