يتاليادا تۇڭعىش رەت «اباي» وپەراسى قويىلادى

استانا. قازاقپارات - اتاقتى ستسەنوگراف ەتسيو فريدجەريو مەن كوستيۋم ازىرلەۋشى فرانكا سكۋارچاپينو وپەرانى كوركەمدەۋگە اتسالىستى. يتاليالىقتار ابايدىڭ جۇمىس ورنىنان التىن ءتۇستى وراسان زور كىتاپحانا، گلوبۋس كورە الادى.

سوڭعى كورىنىستە 3D- تەحنولوگيا پايدالانىلادى، دەپ حابارلايدى قازاقپارات «استانا وپەرا» تەاترىنىڭ باسپا ءسوز قىزمەتىنە سىلتەمە جاساپ

«استانا وپەرا» تەاترى يتالياعا گاسترولدىك ساپارمەن بارادى. ۇجىم 8 جانە 10 - قاراشا كۇندەرى اتاقتى گەنۋيالىق «كارلو فەليچە» تەاترىنىڭ ساحناسىندا ونەر كورسەتەدى. كورەرمەننىڭ نازارىنا ا. جۇبانوۆ پەن ل. حاميديدىڭ «اباي» وپەراسى، سونىمەن قاتار ل. ۆ. بەتحوۆەننىڭ №9 سيمفونياسى ۇسىنىلادى. گاسترول ق ر مادەنيەت جانە سپورت مينيسترلىگىنىڭ قولداۋىمەن «رۋحاني جاڭعىرۋ» باعدارلاماسى اياسىندا وتەدى.

ديريجەرلىك پۋلت باسىندا - ق ر ەڭبەك سىڭىرگەن قايراتكەرى، «استانا وپەرا» تەاترىنىڭ باس ديريجەرى، الەمگە ايگىلى ماەسترو الان بورىبايەۆ.

«اباي» وپەرالىق سپەكتاكلىندە باستى پارتيانى ورىنداۋشىلار: اباي - قازاقستاننىڭ ەڭبەك سىڭىرگەن قايراتكەرلەرى سۇندەت بايعوجين، جانات شىبىقبايەۆ؛ اجار - قازاقستاننىڭ ەڭبەك سىڭىرگەن ءارتىسى، ق ر مەملەكەتتىك سىيلىعىنىڭ لاۋرەاتى مايرا مۇحامەد قىزى، قازاقستاننىڭ ەڭبەك سىڭىرگەن ءارتىسى جاننات باقتاي، ايدار - حالىقارالىق بايقاۋلاردىڭ لاۋرەاتى مەيىر باينەش، قازاقستاننىڭ ەڭبەك سىڭىرگەن قايراتكەرى نۇرلان بەكمۇحامبەتوۆ؛ ءازىم - بەيىمبەت تاڭارىقوۆ، رامزات بالاكيشييەۆ؛ جيرەنشە - ەۆگەنيي چاينيكوۆ، قازىبەك دوسمۇحامبەتوۆ؛ قارلىعاش - حالىقارالىق بايقاۋلاردىڭ لاۋرەاتتارى تاتيانا ۆيتسينسكايا، ماليكا مينيزيني؛ كوكباي - تالعات عالەيەۆ، ەرجان سايپوۆ؛ سىرتتان - ارمەنيانىڭ حالىق ءارتىسى بارسەگ تۋمانيان، بولات ەسىمحانوۆ؛ نارىمبەت - رامزات بالاكيشيەۆ، ەرۋلان كامەل؛ مەس - شىڭعىس راسىلحان، حايدار مۇستاپين.

قازىرگى زاماننىڭ اتاقتى ستسەنوگرافى ەتسيو فريدجەريو مەن كوستيۋمدەر بويىنشا سۋرەتشى - «وسكار» سىيلىعىنىڭ لاۋرەاتى فرانكا سكۋارچاپينونىڭ كەرەمەت ۇيلەسكەن شىعارماشىلىق جۇبىنىڭ وپەرانى جاساۋ بويىنشا اتقارعان جۇمىسىنا كورەرمەننىڭ بەي- جاي قالمايتىنى انىق. بىرەگەي ستسەنوگرافيا اقىننىڭ ىشكى جان- دۇنيەسىن اشقانداي: يتاليالىق ونەرسۇيەر قاۋىم ابايدىڭ جۇمىس ورنىنان التىن ءتۇستى وراسان زور كىتاپحانا، گلوبۋس، ارميللياردى كورە الادى. ال بولمەنىڭ ەسىگى تاڭدانعان جۇرتشىلىقتىڭ الدىندا ايقارا اشىلادى. سوڭعى كورىنىستە پايدالانىلاتىن 3D- تەحنولوگياسى وتە ورىندى قوسىلىپ، شاتتىققا تولى اسەرگە بولەيدى.

«استانا وپەرا» موبت قويىلىمىنداعى «اباي» وپەراسى 2018 -جىلعى ادەبيەت جانە ونەر سالاسىنداعى مەملەكەتتىك سىيلىق الۋعا ۇسىنىلىپ، ەكىنشى كەزەڭىنە وتكەنىن ايتا كەتكەن ءجون. مۋزىكا سىنشىلارى اتالمىش ساحنالىق قويىلىمنىڭ الىپتىعىن، كوپقىرلىلىعى مەن اۋقىمدىلىعىن بىرنەشە رەت اتاپ ءوتتى. ول قازاقستاننىڭ وپەرا ونەرىنىڭ جاڭا كەزەڭى بولىپ تابىلادى جانە الەمنىڭ ۇزدىك ساحنالارىندا تالاي رەت ۇسىنىلاتىنى ءسوزسىز.

«كارلو فەليچە» تەاترىنىڭ باسشىلىعى يتاليالىقتاردىڭ «استانا وپەرانىڭ» نيۋ- يورك، پاريج جانە ەۋروپا مەن ا ق ش- تىڭ باسقا دا قالالارىندا ءساتتى وتكەن گاسترولدەرى جايلى ەستىپ، قانىق بولعاندىعىن جەتكىزدى.

«بۇل يتاليانىڭ وپەرا تاريحىنداعى عالامات «اباي» سپەكتاكلىنىڭ تۇڭعىش ورىندالۋى بولماق. وقيعاعا ەرەكشە ماڭىزدىلىق ۇستەيتىن ونىڭ قازاق تىلىندە قويىلۋى»، - دەپ اتاپ ءوتتى «كارلو فەليچە» تەاترىنىڭ ديريجەرى دجۋزەپپە اكۋاۆيۆا.

بۇدان بولەك، «استانا وپەرا» تەاترىنىڭ ۇجىمى گەنۋيالىق كورەرمەننىڭ نازارىنا ل. بەتحوۆەننىڭ №9 سيمفونياسىن ۇسىنادى. شيللەردىڭ «قۋانىش» وداسىنىڭ ماتىنىنە جازىلعان سيمفونياداعى حوردىڭ فينالى تۋىندىنىڭ يدەياسىن ايتارلىقتاي اشا تۇسەدى.

بەتحوۆەننىڭ ءومىر ءسۇرىپ، تالاي تۋىندىلاردى دۇنيەگە اكەلگەن ۆەنا قالاسىندا ءبىلىم العان جانە ۆەنالىق كلاسسيكالىق ديريجەرلىك مەكتەبىنىڭ وكىلى الان بورىبايەۆ سيمفونيالىق وركەسترگە ديريجەرلىك ەتەدى.

سونىمەن قاتار، كونسەرتكە ق ر ەڭبەك سىڭىرگەن قايراتكەرى ەرجان ءداۋىتوۆتىڭ جەتەكشىلىگىمەن «استانا وپەرا» مەن «كارلو فەليچە» حور ارتىستەرى، سونداي- اق جەتەكشى سوليستەر قازاقستاننىڭ ەڭبەك سىڭىرگەن قايراتكەرلەرى تەنور نۇرلان بەكمۇحامبەتوۆ، سوپرانو جۇپار عابدۋللينا، مەتستسو- سوپرانو دينا حامزينا قاتىسادى.