وسكەمەننىڭ جاڭا اكىمى ءبىر ايدا تىندىرعان شارۋالارىن باياندادى
«ءور التايدىڭ ورتالىعى - وسكەمەن قالاسىنا اكىم بولىپ تاعايىندالعانىما بۇگىن تۋرا ءبىر اي بولدى. ادەتتە جاڭا قىزمەتكە كىرىسكەندە وڭ-سولدى تانىپ، تانىسۋعا ءبىراز ۋاقىت جۇمسالاتىن. ءبىراق، تاياپ قالعان قىس، اياقتالۋى ءتيىس جولدى جوندەۋ جۇمىستارى مۇندايعا مۇرشا بەرمەدى. وعان قوسا، ءبىراز جىل ءوزىم تۇرىپ كەلگەن وسكەمەننىڭ تىرشىلىگى مەن ءۇشىن بوتەن ەمەس»، - دەپ جازادى جاقسىلىق ومار.
قالا اكىمىنىڭ جازۋىنشا، ەڭ الدىمەن شاھاردى قىسقا دايىنداۋ جۇمىستارى پىسىقتالعان.
«قالانى جىلىتۋعا جاۋاپتى كاسىپورىنداردىڭ، باسقا دا كوممۋنالدىق ۇيىمداردىڭ جۇمىسىن تەكسەرىپ، قارقىنىن ارتتىردىق. جىلىتۋ ماۋسىمىنا دايىندىق جوسپارلى تۇردە جۇرگىزىلۋدە. قالا ءۇشىن بيىلعى جىلدىڭ وزەكتى ماسەلەسى - جوندەۋى سوزىلىپ كەتكەن، قوپارىلىپ جاتقان كوشەلەر. سوندىقتان، بۇل سۇراق ەرەكشە باقىلاۋعا الىندى. كۇندەلىكتى نىسانداردى ارالاۋدىڭ ناتيجەسىندە جۇمىس ىلگەرىلەدى. اتاپ ايتار بولساق، بۇگىن كرىلوۆ كوشەسى ارقىلى وتەتىن ءۇلبى وزەنىندەگى كوپىر اشىلدى. جاقىن كۇندەرى استانا كوشەسى اشىلادى»، - دەيدى ول.
جاقسىلىق وماردىڭ جازۋىنشا، قالانىڭ ءسانىن بۇزاتىن، زاڭسىز ورناتىلعان دۇڭگىرشەكتەردى العىزۋ بويىنشا دا جۇمىس كۇشەيتىلگەن. ارنايى كوميسسيا انىقتاعان 200 دۇڭگىرشەكتىڭ 14 ءى الىنىپ تاستالعان.
«جالپى، وسكەمەننىڭ جەرگىلىكتى اتقارۋشى ورگاندارى قالا تۇرعىندارىنىڭ بەلسەندى تۇردە ارالاسۋىمەن شاھارىمىزدا ءومىر ءسۇرۋ ساپاسىن ارتتىرۋعا باعىتتالعان جۇمىستاردى كۇندەلىكتى اتقارۋدا. جۇمىلا ىستەگەن جۇمىستىڭ ناتيجەسى وڭ بولارى انىق»، - دەيدى اكىم.