تۇركيا بيزنەسمەندەرى ءۇشىن قازاقستان قاي تۇرعىدا تارتىمدى - داۋرەن ابايەۆ

استانا. قازاقپارات - «حابار» ارناسىنداعى «اشىق ديالوگ» باعدارلاماسىندا قوناق بولعان ق ر اقپارات جانە كوممۋنيكاتسيالار ءمينيسترى داۋرەن ابايەۆ مەملەكەت باسشىسى نۇرسۇلتان نازاربايەۆتىڭ جاقىندا تۇركياعا جاساعان ساپارىنا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«بۇگىنگى تاڭدا تۇركيا ەكونوميكاسىندا تۋىنداعان قيىندىقتار ەشكىمگە دە قۇپيا ەمەس. تۇرىكتىڭ ليراسى دوللارعا قاتىستى ءبىرشاما قۇنىن جوعالتتى. ءوزىڭىز ەلەستەتىپ كورىڭىز، جىل باسىنان بەرى تۇرىك ۆاليۋتاسى 70 پايىزعا دەيىن السىرەگەن. ماسەلەن، تەڭگە دوللارعا قاتىستى قاڭتار مەن قىركۇيەك ارالىعىندا شامامەن 13 پايىزعا ارزاندادى. مىنە، تۋىنداعان قيىندىقتار اياسىندا باتىستاعى سەرىكتەستەرىمەن قارىم-قاتىناستا تۇركيا بەلسەندى تۇردە ءبىرشاما جول ىزدەپ جاتىر. وسىنىڭ اياسىندا ءبىزدىڭ پرەزيدەنتتىڭ ساپارى وتە ىڭعايلى ۋاقىتتا جاسالدى»، - دەدى مينيستر.

داۋرەن ابايەۆ ساپار الدىندا وتكىزىلگەن بيزنەس- فورۋمدا (قازاقستان - تۇركيا) شامامەن جالپى قۇنى 1,7 ميلليارد ا ق ش دوللارىن قۇرايتىن 22 كوممەرتسيالىق قۇجاتقا قول قويىلعانىن ەسكە سالدى. سونىمەن بىرگە، وسى جولى تۇركيا رەسپۋبليكاسىنىڭ باسشىلىعىمەن كەزدەسۋمەن قاتار، مەملەكەت باسشىسى 25 تۇركيالىق ءىرى بيزنەسمەنمەن كەزدەسكەن.

تۇركيا بيزنەسمەندەرى ءۇشىن قازاقستان قاي تۇرعىدا تارتىمدى - داۋرەن ابايەۆ «بۇكىل تۇركيا ەكونوميكاسىنىڭ 15 پايىزى - سولاردىڭ ۇلەسىندە. ءبىزدىڭ پرەزيدەنت ولاردى قازاقستانعا ينۆەستيتسيا سالۋعا شاقىردى»، - دەدى داۋرەن ابايەۆ.

مينيستر سونىمەن قاتار، تۇرىك بيزنەسى ءۇشىن قازاقستان قانشالىقتى تارتىمدى بولا الاتىنىن ءتۇسىندىردى.

«18 ميلليون حالقى بار قازاقستان - ينۆەستيتسيالىق تارتىمدىلىعى اسا جوعارى ەمەس ايماق ەكەنىن ءتۇسىنۋىمىز كەرەك. ءبىراق، ءبىز ەۋرازيالىق ەكونوميكالىق وداققا كىرەمىز. ال بۇل - 180 ميلليوندىق نارىق. تۇرىك بيزنەسمەندەرى قازاقستاندا جۇمىس ىستەيتىن بولسا، وسى الىپ نارىقتان پايدا تابا الادى. ءبىزدىڭ پرەزيدەنتتىڭ تۇرىك بيزنەسمەندەرىمەن كەزدەسۋ كەزىندە ايتقانىنداي، «ينۆەستورلار ءۇشىن پروتسەدۋرالاردى قاي تۇستان جەڭىلدەتە الاتىنىمىزدى كورسەتىڭىزدەر». ءبىز ونى تۇزەتە الامىز»، - دەدى داۋرەن ابايەۆ.

سونىمەن بىرگە، مينيستر تۇركيادا نۇرسۇلتان نازاربايەۆقا نەلىكتەن ۇلكەن ىقىلاسپەن ءارى قۇرمەتپەن قارايتىنىن ايتىپ بەردى.

«ونىڭ سەبەپتەرى كوپ. تۇركيا مەن رەسەي باسشىلارىنىڭ قايتا دوستاسۋىنىڭ وزىندە، وزدەرى مويىنداعانداي، قازاقستاندىق كوشباسشىنىڭ ەڭبەگى بار. مۇنىڭ ءوزى كوپ نارسەدەن حابار بەرەدى. ءبىز دە قازاقستاننىڭ تاۋەلسىزدىگىن ءبىرىنشى بولىپ مويىنداعان باۋىرلاس تۇركيانىڭ باسشىلىعىنا وتە ۇلكەن قۇرمەتپەن قارايمىز. زور ابىروي سول ۋاقىتتىڭ وزىندە قالىپتاسىپ قويعان»، - دەدى مينيستر.