داۋرەن ابايەۆ تۇركىستان مەن شىمكەنت نەلىكتەن بولىنگەنىن ءتۇسىندىردى

استانا. قازاقپارات - «حابار» ارناسىنداعى «اشىق ديالوگ» باعدارلاماسىندا قوناق بولعان ق ر اقپارات جانە كوممۋنيكاتسيالار ءمينيسترى داۋرەن ابايەۆ تۇركىستان وبلىسىنىڭ قۇرىلۋى مەن شىمكەنتتىڭ رەسپۋبليكالىق ماڭىزداعى قالا رەتىندە تانىلۋىنىڭ قانداي باسىمدىقتارى بار ەكەنىن ايتىپ بەردى، دەپ حابارلايدى قازاقپارات ءتىلشىسى.

«البەتتە، تۇركىستان وبلىسىنىڭ قۇرىلۋى - ءبىزدىڭ پرەزيدەنتتىڭ ايماقتىق ساياساتتا وتە ماڭىزدى ءارى لوگيكالىق تۇرعىدان ءجىتى ولشەنگەن قادامى. تۇركىستان - بارشا قازاق حالقىنىڭ، بۇكىل تۇركى دۇنيەسىنىڭ كيەلى قالاسى. ونىڭ تاريحى مىڭ جارىم جىلدى قامتيدى. بۇل - ءبىزدىڭ مادەني كودىمىزدىڭ ءبىر نەگىزى. وزدەرىڭىز بىلەتىندەي، تۇركىستاندا 350 گە تارتا قازاق حاندىعىنىڭ داڭقتى حاندارى مەن بيلەرى، باتىرلارى مەن اتاقتى تۇلعالارى جەرلەنگەن. تۇركىستان - بايقال مەن ىستامبۇلعا دەيىن سوزىلعان حالىقتاردىڭ ساناسىندا جاڭعىرعان قالا. شەتەلدىك ساراپشىلار پرەزيدەنتتىڭ بۇل شەشىمىنە قاتىستى پىكىرىن بىلدىرە كەلە، جاڭا وبلىس ورتالىعى بۇكىل تۇركى الەمىن دە ۇيلەستىرە الاتىنىن، شاھاردىڭ بۇكىل تۇركى وركەنيەتىنىڭ تارتىلىس نۇكتەسىنە اينالاتىنىن ايتىپ جاتىر»، - دەدى داۋرەن ابايەۆ.

ءمينيستردىڭ ايتۋىنشا، اتالعان شەشىمنىڭ قابىلدانۋىنىڭ بىرنەشە سەبەپتەرى بار.

«بىرىنشىدەن، وڭتۇستىك قازاقستان وبلىسىنىڭ حالقى شامامەن 3 ميلليونعا جەتتى. و ق و حالقىنىڭ سانى جاعىنان ەڭ ءىرى وبلىس بولدى. حالىقتىڭ تىعىزدىعى وتە جوعارى. مىنە، سوندىقتان جاڭا وبلىستىڭ قۇرىلۋى ەل وڭتۇستىگىن باسقارۋدىڭ تيىمدىلىگىن ارتتىرادى. جالپى، ايماق - دەموگرافيالىق كوشباسشى وڭىرلەردىڭ ءبىرى. وندا ميگراتسيالىق پروتسەستەر وتە قارقىندى. ەكىنشىدەن، شىمكەنت پەن تۇركىستان وبلىسىنىڭ جاڭا اكىمشىلىك مارتەبەسى ايماقتىڭ ينفراقۇرىلىمدىق جوبالارىن ودان ارى ءتيىمدى قارجىلاندىرۋعا مۇمكىندىك بەرەدى»، - دەدى مينيستر.

داۋرەن ابايەۆ اتالعان شەشىم تۇرعىسىندا پرەزيدەنت وتە ىڭعايلى ۋاقىتتى تاڭداپ العانىن اتاپ ءوتتى.

«ءدال وسى قادام نەلىكتەن ون نەمەسە بەس جىل بۇرىن ەمەس، ءدال قازىر جاسالىپ وتىر دەگەن سۇراقتىڭ تۋىنداۋى زاڭدى. بۇعان وتە اۋقىمدى جۇمىستار سەبەپ بولىپ وتىرعانىن ءتۇسىنۋ كەرەك. بۇگىنگى تاڭدا مارتەبە بەرۋ تۇرعىسىندا بارلىق جاعداي جاسالدى. ماسەلەن، بەينەۋ - بوزوي - شىمكەنت گاز قۇبىرى سالىندى. تاشكەنتپەن ساۋدا قارىم-قاتىناسىنىڭ جاڭا ورەسىنە قول جەتكىزىلدى. وزبەكستان - جالپى حالقىنىڭ سانى 30 ميلليون بولاتىن ۇلكەن نارىق. سونىمەن بىرگە، باتىس ەۋروپا - باتىس قىتاي كولىكتىك ءدالىزىنىڭ ۋچاسكەسى سالىندى. وسىنىڭ ءبارى دە ايماققا ينۆەستيتسيا تارتۋعا تەڭدەسسىز جاعداي جاسايدى»، - دەدى ۆەدومستۆو باسشىسى.

سونداي-اق، مينيستر ءدال وسى باسىمدىقتار ايماققا ۇلكەن سەرپىن بەرەتىنىن جەتكىزدى.

«ۇشىنشىدەن، بۇل تۇركىستان قالاسىنىڭ ءوزىنىڭ دامۋىنا ۇلكەن سەپ بولادى. ايماقتا مىڭداعان ادامداردى جۇمىسپەن قامتيتىن ۇلكەن قۇرىلىس جۇمىستارى باستالارىنا سەنىمدىمىن. ءوندىرىس كولەمى، قۇرىلىس ماتەريالدارى ارتادى. بۇگىنگى تاڭدا مەملەكەت باسشىسى تۋريستىك كلاستەردىڭ دامۋىنا ەرەكشە نازار اۋدارىپ وتىر. مىنە، تۇركىستاندا بۇل رەتتە وسى سالانىڭ درايۆەرى بولا الاتىنداي بارلىق مۇمكىندىك بار»، - دەدى داۋرەن ابايەۆ.